Ուսուցչի օրվա նախաշեմին ՀՀ սպորտի եւ երիտասարդության հարցերի փոխնախարար Խաչիկ Ասրյանը այցելեց Երեւանի օլիմպիական պետական մարզական քոլեջ: Նա ընթերցեց նախարար Յուրի Վարդանյանի շնորհավորական ուղերձը քոլեջի մանկավարժական կոլեկտիվին եւ նրանցից մի քանիսին պարգեւատրեց նախարարի շնորհակալագրերով:
Խաչիկ Ասրյանի հետ մարզական կրթօջախ եկել էին նաեւ «Հայոց Արծիվներ» ՀԿ ներկայացուցիչները: Հայրենասիրական այս կազմակերպությունը 2013 թվականը Հայաստանի, ԼՂՀ անկախության եւ Հայոց բանակի կազմավորման տարեդարձերի կապակցությամբ հայտարարել է ռազմահայրենասիրական ծրագրերի իրականացման տարի եւ ՊՆ ու ԼՂՀ ՊԲ տարբեր զորամասերում, սահմանագծի մարտական հենակետերում, հանրակրթական դպրոցներում կազմակերպում եւ իրականացնում է հայրենասիրական եւ ռազմահայրենասիրական միջոցառումներ:
Այցելությունը Երեւանի օլիմպիական պետական մարզական քոլեջ թեեւ այդ ծրագրի մաս չէր կազմում, սակայն պարոն Ասրյանը «Հայոց Արծիվների» կողմից այս կրթօջախին եւս 10 օդաճնշիչ հրացանների լրակազմ նվիրեց: Ծրագիրն իրականացվում է այս տարվա հունվար ամսից եւ իր մեջ ներառելու է 1400 կրթօջախ: «Իմ եւ մեր կազմակերպության նպատակը անընդհատ հայրենասեր սերունդ ունենալն է: Իսկ հայրենասեր սերունդ ունենալու մասին խոսք լինել չի կարող, եթե դպրոցներում եւ կրթօջախներում ռազմագիտության դասերն անցնում են առանց կրակային պատրաստվածության: Այդ նպատակով էլ «Հայոց Արծիվներն» իր ուսերին է վերցրել այդ բարդ, դժվարին, բայց խիստ անհրաժեշտ խնդիրը եւ հայրենասեր անհատների աջակցությամբ կյանքի է կոչում», – հայտարարեց Խաչիկ Ասրյանը:
Կարդացեք նաև
Աշոտ ՀԱԿՈԲՅԱՆ
