Պարզվում է, որ Գորիսի քաղաքապետարանի կողմից հայտարարված մրցույթներում հիմնականում շահում է Գորիսի քաղաքապետ Նելսոն Ոսկանյանին պատկանող «Գորեր» ՍՊԸ-ն:
Սյունիքի մարզում գործող «Իրավունքների տեղեկատվական կենտրոն» հասարակական կազմակերպությունն հրապարակել է Գորիսի քաղաքապետարանի հայտարարած մրցույթների եւ մրցույթի երջանիկ շահողների ցանկը (gnumner.am կայքից), որը ներառում է 2011-2013թթ. հայտարարված մրցույթների տվյալները: Ըստ ներկայացված ցանկի՝ մրցույթներում առավել շատ շահող է դուրս եկել «Գորեր» ՍՊԸ-ն եւ իրավունք ստացել Գորիսում տարբեր շինարարական աշխատանքներ իրականացնել:
Նույն պատկերը նաեւ այսօր է: Գորիսի Գրիգոր Տաթեւացու անվան հրապարակի կանաչապատ տարածքների բարեկարգման՝ լուսավորության, ոռոգման եւ ջրավազանի շատրվանի հիմնանորոգման աշխատանքների իրականացնողը «Գորեր» ՍՊԸ-ն է: Այդ աշխատանքների ընդհանուր գումարը կազմում է 12 մլն 348 հազար դրամ, իսկ վերջնաժամկետը՝ մինչեւ հոկտեմբերի 31-ը: Գորիս քաղաքի ներհամայնքային ճանապարհների ծածկի փոսային նորոգման աշխատանքներ իրականացնելու իրավունք կրկին ստացել է տվյալ կազմակերպությունը, իսկ աշխատանքների իրականացման համար նախատեսված գումարը 19 մլն. 30 հազար դրամ է: Այս ցանկը կարելի է երկար շարունակել, բայց բավարարվենք եւս մի քանիսը ներկայացնելով:
Կարդացեք նաև
« 1.ՀՀ Սյունիքի մարզի Գորիս քաղաքի Գ. Աշոտի և Սյունիքի փողոցների մայթերի հիմնանորոգման աշխատանքներ, գինը` 3 մլն 797 հազ.դրամ, մրցույթը շահած կազմակերպություն ` «Գորեր» ՍՊԸ:
2.Գորիս քաղաքի Ղաթրինի Ձոր և Սաթյան 2-րդ նրբանցքի հեղեղատարների վերջնամասերի կառուցման աշխատանքներ, գինը` 3 մլն 323 հազ դրամ, մրցույթը շահող «Գորեր» ՍՊԸ:
3.ՀՀ Սյունիքի մարզի Գորիս քաղաքի Գ. Նարեկացի ու Մամիկոնյան խաչմերուկի ջրընդունիչի կառուցման և Մ. Խորենացի փողոցում սելավատարին միացման աշխատանքների ձեռքբերում, գինը՝ 1 656 980 դրամ, մրցույթը շահող՝ «Գորեր» ՍՊԸ:
4. 2012թ. սեպտեմբերի 5. ՀՀ Սյունիքի մարզի Գորիս քաղաքի ներհամայնքային ճանապարհների ասֆալտբետոնե ծածկի փոսային նորոգման աշխատանքների ձեռքբերում, մրցույթը շահած կազմակերպություն `«Գորեր» ՍՊԸ , գինը` 18 400 932 (տասնութ միլիոն չորս հարյուր հազար ինը հարյուր երեսուներկու) ՀՀ դրամ:
5. 2011թ. նոյեմբերի 25. Գորիս քաղաքի Գ.Տաթևացու և Սյունիքի փողոցների մայթերի ասֆալտբետոնե ծածկի վերականգնման աշխատանքների ձեռքբերում, մրցույթը շահած կազմակերպություն ` «Գորեր» ՍՊԸ , գինը` 1 945 020 (մեկ միլիոն ինը հարյուր քառասունհինգ հազար քսան) ՀՀ դրամ», – մեջբերված է հրապարակված ցանկից: Գորիսի քաղաքապետ Նելսոն Ոսկանյանի հետ մեզ չհաջողվեց զրուցել եւ լսել նրա պարզաբանումը, քանի որ նա աշխատանքային այցով այս պահին Ֆրանսիայում է գտնվում: Քաղաքապետի հետ այս հարցի վերաբերյալ կփորձենք զրուցել նրա վերադարձից հետո:
Մերի ՍՈՂՈՄՈՆՅԱՆ
