«Շնորհակալ եմ, որ դուք կաք, շատ հետաքրքիր թեմաներ եք քննարկում, փառք Աստծո, վերջապես ես կարողացա հագեցնել իմ հոգեւոր սովը»,- այսպիսի մեկնաբանություններ հաճախ կարելի է կարդալ «Սարկավագագրքում»՝ www.sarkavagagirq.net-ում:
«Տարիներ առաջ, երբ տակավին սարկավագ էի, ցանկացա գեղարվեստական այն ստեղծագործությունները, որ մինչ այդ թղթին էի հանձնել, ներկայացնել նաեւ համացանցային ընկերներիս ուշադրությանը: Ու թեեւ սկզբում շատ խանդավառ չէի բլոգ վարելու նախաձեռնությամբ, այնուամենայնիվ, ամիսներ հետո որոշեցի մատուցել Աստծո խոսքը, մի բան, որ 3 տարի առաջ հաճախ չէիր հանդիպի համացանցում»,-նշում է բլոգի հիմնադիր տեր Հուսիկ քահանա Սարգսյանը:
Սարկավագի ստեղծած գիրքը՝ «Սարկավագագիրքը», համալրվեց քարոզներով, հոգեւոր հոդվածներով, Աստվածաշնչի մեկնաբանություններով, փոքրիկ ակնարկներով ու գեղարվեստական գործերով, որոնց թիվն այժմ հասնում է 200-ի: Երեք տարվա ընթացքում բլոգը 280.000-ից ավելի այցելություն է գրանցել:
«Հոգեւոր գրականություն կամ Աստվածաշունչ միշտ չէ, որ կարողանում ենք կարդալ, թեպետ միշտ կարեւոր ու պարտադիր է: Տեր հոր նյութերը հետաքրքիր եւ օգտակար են նրանով, որ մասնագիտական- աստվածաբանական չեն, այլ՝ ավելի շատ պարզ հավատացյալի համար, հոգեւոր գիտելիքները զարգացնող: Այստեղ կարեւորը ներկայացված է մատչելի»,- ասում է բլոգի մշտական ընթերցող Հասմիկ Հովհաննիսյանը:
Կարդացեք նաև
«Ջանում եմ խոսքս հնարավորինս «դյուրամարս» դարձնել, քանի որ համակարգչի առջեւ նստած մարդը երկար ժամանակ ու համբերություն դժվար թե ունենա»,- նշում է տեր Հուսիկը:
Նրա խոսքով՝ այսօրվա լրատվական հոսքի մեջ, ուր մարդկանց հետաքրքրությունները պտտվում են ինքնասպանությունների, վթարների, այլոց դժբախտությունների, աստղերի ու նրանց բարքերի շուրջ, հոգեւոր խոսքը լսելու անհրաժեշտությունը կա: Ի վերջո, ինչպես Ավետարանն է ասում, «Մարդ ոչ միայն հացով կապրի, այլ Աստծո բերանից դուրս եկած ամենայն խոսքով»: Բլոգի մշտական ընթերցող Մարիամ Մարիկյանի խոսքով.
«Բլոգն ինձ տվել է մտածելու, ինքնաքննադատելու, փոխվելու, ավելի լավը դառնալու բազում հնարավորություններ: Բլոգի նյութերը մեծ փոփոխություն են առաջացնում ներսումդ, անգամ տակնուվրա անում, բոլոր սխալներդ աչքիդ առաջ են գալիս…: Այստեղ եւ խրատներ են, եւ խոսք, եւ սեր…մի խոսքով՝ քրիստոնյայի կերտում, ներսի եւ դրսի ներդաշնակություն…: Նյութերը հուզել, ոգեշնչել ու ապրեցրել են»:
Թեեւ պատահում է, որ մեկնաբանություններում ամբարտավան ու վիրավորական խոսքեր են լինում, սակայն դրանք իրականում ոչինչ են այն ջերմ գնահատականների դիմաց, որ ստանում է բլոգը:
Շատ թեմաներ առաջարկում են հենց նրանք էլ. փոստով կամ ակամայից՝ իրենց հարցերի միջոցով: Երբեմն թեմաներ են ծնվում նաեւ օրվա համացանցային, լրատվական հոսքին հետեւելու շնորհիվ:
Մեր հարցին՝ ինչպե՞ս կողմնորոշվել համացանցային բազմազան իրականության մեջ, տեր հայրը պատասխանում է. «Եթե մարդը որոշակի հոգեւոր եւ ազգային արժեհամակարգի կրող է. հոգեւոր ասպարեզում բնօրինակը «չինական արտադրանքից» տարբերվում է նույնիսկ հպանցիկ հայացքի դեպքում, միայն թե… Շատերը չեն ճանաչում հենց բնօրինակը, անարատը, դարերով սրբորեն ավանդվածը: Իսկ քանի դեռ չենք ճանաչում մեր Մայր եկեղեցին ու մեր ուղղափառ հավատքի դրույթները, գայլն ու գառն էլ տարբերելը շատ դժվար պիտի լինի…Լավագույն ճանապարհը, այսուամենայնիվ, վիրտուալությունից դուրս գալն է եւ իրական կյանքում, իրական աղոթքով ու իրական գործուն մասնակցությամբ եկեղեցին զորացնելը»:
Նշենք, որ www.sarkavagagirq.net-ը նաեւ ֆեյսբուքյան իր էջն ունի, ուր կարելի է ծանոթանալ բլոգի գրառումներին:
ՄԱՐԻԱՄ ԱՎԵՏԻՍՅԱՆ
«Առավոտ» օրաթերթ
