Ինչպես տեղեկացանք Կապանի բժշկական կենտրոնի շտապ օգնության կայանից՝ այս տարի տոն օրերին Կապանի տարածաշրջանում կանչերի թիվը նախորդ տարվա համեմատ ավելացել են: Դեկտեմբերի 31-ին «Շտապօգնությունն» այս տարի 20 կանչ է սպասարկել, իսկ հունվարի 1-ին՝ 30: Թունավորման դեպքեր այս տարի չեն արձանագրվել, բայց եղել են սննդային ալերգիաների դեպքեր: Դեկտեմբերի 31-ի հերթապահ բուժքույր Հասմիկ Առաքելյանի փոխանցմամբ՝ հիմնականում սպասարկել են 60-80 տարեկան խրոնիկ հիվանդների, ովքեր ունեին սրտի, երիկամների հետ կապված խնդիրներ եւ որոշ բնակիչների մոտ էլ սննդային ալերգիաներ են արձանագրվել: Բուժքրոջ խոսքով՝ գյուղերից ստացված կանչերը սպասարկելիս դժվարություններ են լինում, պատճառը սառած ճանապարհներն են: Սառած ճանապարհներով «շտապօգնության» մեքենան ստիպված է լինում դանդաղ ընթանալ՝ վթարներից խուսափելու համար, թեեւ դրա հետեւանքով ժամանակ առ ժամանակ հարկ է լինում կանչերը մի փոքր ուշ սպասարկել:
Մերի ՍՈՂՈՄՈՆՅԱՆ
