Ի տարբերություն մայրաքաղաքի եւ հանրապետության մի շարք այլ մարզերի՝ Սյունիքում բնակիչները համեմատաբար տաք ձմեռ են վայելում: Մինչդեռ հանրապետությունում մի շարք վայրերում -4 կամ ավելի ցածր ջերմաստիճան է գրանցվել այսօր ցերեկը, ապա Սյունիքի մարզի Մեղրի քաղաքում ցերեկը ջերմաստիճանը հասել է +9,4-ի (հիմա -1.3), Կապանում՝ +8-ի ( այս պահին +1.3), Գորիսում՝ +7-ի (այս պահին -3), Քաջարանում +1-ի (հիմա -8), Սիսիանում՝ +2.1 (հիմա -2,3): Այս մասին մեզ տեղեկացրեցին Սյունիքի մարզային հիդրոմետ ծառայությունից:
Մարզկենտրոնում երեկ ցերեկը նույնիսկ +10 ջերմաստիճան է գրանցվել: Ծառայության պետ Ժորա Գեւորգյանը նշեց, որ Կապանում ավելի տաք ձմեռներ են եղել՝ անկախ այս սեզոնին գրանցված համեմատաբար բարձր ջերմաստիճանի: Այս տարվա հունվարը նախորդ տարվա համեմատ ավելի ցուրտ է: Նմանատիպ եղանակ էր նաեւ 2002 եւ 2007թթ.-ին: Սյունիքի մարզում թույլ ձյուն է տեղացել՝ Գորիսում 0.4 մմ, իսկ Սիսիանում՝ 0.3 մմ: «Ջերմաստիճանի նվազում չի կանխատեսվում, վաղն առանց տեղումների եղանակ է սպասվում մարզում, իսկ հունվարի 15-19-ին ջերմաստիճանը կբարձրանա 3-5 աստիճանով», – տեղեկացրեց Սյունիքի մարզային հիդրոմետ ծառայության պետ Ժորա Գեւորգյանը:
Մերի ՍՈՂՈՄՈՆՅԱՆ
