Սյունիքի նախկին մարզպետ Սուրիկ Խաչատրյանը, արտասահմանից օրեր առաջ վերադառնալուց հետո, Գորիսում խնջույք է կազմակերպել: Ինչը Գորիսի ` 1992- 1994 թթ. քաղաքապետ, տարածաշրջանի ինքնապաշտպանության կոմիտեի համանախագահ Սամվել Հարությունյանի տեղեկություններով, ձախողվել է:
«Իր թալանածից փշրանքներն օգտագործելով` Գորիսում գտնվող ու իրեն պատկանող հանդիսությունների սրահում փորձել է կերուխում կազմակերպել` հրավիրելով ՀՀԿ Սյունիքի մարզային ակտիվին: Այն փորձել է դարձնել իր մեծարանքի շոու, իր գլխավոր հովանավորներին ապացուցելու, որ Գորիսը ոչ թե վերադառնալու է իր հերոսական անցյալին, այլ շարունակելու է մնալ ամոթալի լիսկայանոց: Իմ տեղեկություններով, շատ մեծ դժվարությամբ է կարողացել այդ հավաքը կազմակերպել: Բացի Գորիսից եւ մարզկենտրոն Կապանից մարզի մյուս բնակավայրերից հրավիրվածները` մանավանդ պետական պաշտոնյաները, չեն ներկայացել:
Սուրիկ Խաչատրյանին հաջողվել է ընդամենը Գորիսի մի քանի պաշտոնյաների եւ սոված, կիսասոված մարդկանց հավաքել: Ինչը ենթադրում է` այդ խնջույքի նախաձեռնությունը գործող մարզպետի` Վահե Հակոբյանի, սրտով չի եղել: Մարզպետարանից, բացի շարքային մի աշխատողից, ոչ ոք չի մասնակցել»:
Պարոն Հարությունյանի տեղեկություններով, Սուրիկ Խաչատրյանի կազմակերպած հավաքի մասնակիցների մի մասը եղել են նրա հորեղբորորդու տնօրինած «Որոտանի» ՀԷԿ-ի աշխատակիցները` հավաքարարից մինչեւ գլխավոր տնօրեն. «Նրան չի հաջողվելու նախկին դիրքերը վերականգնել: Գորիսեցիներն այլեւս չեն ցանկանալու մնալ լիսկայության լծի տակ»:
Կարդացեք նաև
Արփինե ՍԻՄՈՆՅԱՆ
