Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը հրապարակեց Հայաստանի քաղաքագետների միության նախագահ, Ազգային ժողովի 2-րդ, 3-րդ գումարման պատգամավոր Հմայակ Հովհաննիսյանի դատավճիռը: Նա մեղավոր ճանաչվեց ՀՀ քրեական օրենսգրքի 121 հոդվածի 1-ին մասով, դատապարտվեց 100 հազար դրամ տուգանքի, նրա նկատմամբ կիրառվեց համաներում՝ պատժից ազատման ձեւով:
Հմայակ Հովհաննիսյանը կբողոքարկի այդ դատավճիռը, որովհետեւ, ինչպես ինքն ասաց Aravot.am-ին՝ ինքը թույլ չի տա, որ իր կենսագրության մաքուր էջը ստվերվի սույն դատավճռով: Հմայակ Հովհաննիսյանն ասաց, որ Քաղաքագետների միությունն այսօր հանդես կգա հայտարարությամբ եւ նորից կպնդի, որ ինքը 2012թ. ապրիլին ԱԺ 5-րդ գումարման պատգամավորության թեկնածու է եղել եւ այս գործի հարուցումը պատահական չի եղել:
Նշենք, որ նա մեղադրվել է «Հայհիդրոէներգոնախագիծ» ընկերության նախագահ Սենիկ Ջուլհակյանին հրելու, միջին ծանրության վնաս հասցնելու համար:
Հմայակ Հովհաննիսյանն իր ցուցմունքում ասաց, որ ընդհանրապես չի հրել Ս. Ջուլհակյանին, այլ ընդամենը փորձ է արել մտնել Քաղաքագետների միության շենք, որն այդ պահին եղել է իր նախընտրական շտաբը:
