Կառավարությունը որոշել է մի շարք ապրանքատեսակներ դրոշմապիտակավորել: Սրանով կառավարությունը փորձում է պայքարել ստվերի դեմ, սակայն, ենթադրվում է, որ այդ պայքարը սպառողների գրպանի հաշվին կլինի`հաշվի առնելով կառավարության նախկին փորձը, երբ գարեջուրն ու ոգելից խմիչքներն էլ պարտադիր դրոշմապիտակավորման տակ ընկան, այդ ապրանքները 10-20 դրամով թանկացան:
Aravot.am-ի հետ զրույցում «Իրազեկ եւ պաշտպանված սպառող» հասարակական կազմակերպության նախագահ Բաբկեն Պիպոյանի դիտարկմամբ` որոշումը կարող է սպառողի համար թե դրական, եւ թե բացասական ազդեցություն ունենա. «Եթե իրենց նպատակը տնտեսությունը ստվերից դուրս բերելն է, ապա ընդհանուր իմաստով, այո, ստվերից դուրս է գալիս, պետական բյուջե մտնում է գումար, որը ինչ-որ մի կերպ գալիս է էլի հասնում սպառողին: Այսինքն, եթե ստվերն են դուրս բերում, դրական գործընթաց է, բայց, ցավոք սրտի, մեր երկրում այդ փորձը չունենք, դրա վառ օրինակն է, օրինակ` գարեջուրն ու սուրճերը դրոշմապիտակ պահանջեցին, ընդամենը 2-3 դրամ էր դրոշմապիտակի գինը, տնտեսվարողը վճարում էր, որը տարեվերջին կառավարությունը հետ էր տալու: Բայց դրան անմիջապես հետեւեց ապրանքի թանկացումները 20-30 դրամով: Այսօր ստացվում է, որ տնտեսությունը ստվերից դուրս է գալիս ոչ թե պետական վերահսկողության արդյունքում, այլ սպառողի հաշվին ու ի վնաս սպառողի»:
Մեր այն հարցին, հնարավոր չէ՞ այլ մեխանիզմ կիրառել ստվերի դեմ պայքարելու համար, որպեսզի սպառողը չտուժի, պարոն Պիպոյանն ասաց, որ ամբողջ աշխարհում, հատկապես գյուղմթերքների դեպքում, ի սկզբանե համապատասխան մարմինները ապրանքի համար սահմանում են իրատեսական գին. «Մեր երկրում ապրանքը տնտեսվարող սուբյեկտը թանկացնում է, ու ոչ ոք չի ասում ինչո՞ւ թանկացրեցիր: Եթե վերահսկվեր, արտադրողը չէր կարողանա թանկացնել 20 դրամով: Նախորդ փորձը ներկայացնեմ` տնտեսվարողը 2-3 դրամ վճարում էր դրոշմապիտակի համար, պետությունը այդ գումարը հետ է վերադարձնում, իսկ եթե հետ է վերադարձնում, դա չպիտի թանկանար, բայց թանկացան: Եթե նա ստիպված թանկացրեց, այն դեպքում, որ իր ծախսը պետությունը փակելու էր, ուրեմն ինքը խոստովանեց, որ ստվերում է աշխատել»:
Այսինքն, ըստ պարոն Պիպոյանի, տնտեսվարողը ստվերի հաշվին ստացած իր նախկին շահույթից չի կարողանում հրաժարվել, ուստի որպեսզի ստվերում ստացող շահույթը պահպանի, արդեն ոչ ստվերում աշխատելով, ապրանքն է թանկացրել: «Եթե տնտեսական մրցակցության պաշտպանության պետական հանձնաժողովն ու կոնկրետ ոլորտը վերահսկող այլ մարմինների հետ համատեղ գրոհի ենթարկեն տնտեսվարողին` սպառողի հաշվին ստվերի փողը հետ բերելու համար, այդ դեպքում ոչ ոք ռիսկ չի անի թանկացնի: Տարօրինակն այն է, որ այլ տեղերում բացահայտ թալան կա, որի դեմ պայքարելու դեպքում ավելի էական գումարներ կբերեն պետբյուջե, բայց չգիտես ինչու այդ ուղղությամբ գործողություն չեն անում, այս դեպքում անում են: Կառավարության` ստվերի դեմ պայքարի այս մոտեցումը կարող է սպառողի համար դրական լինի, բայց մինչ օրս նման բոլոր դեպքերում ի հաշիվ սպառողի է եղել, ոչ թե` տնտեսվարողի»,-ասաց սպառողների պաշտպանը:
Կարդացեք նաև
Ինչպես ներկայացված է կառավարության որոշման մեջ, դրոշմապիտակավորվող ապրանքներն են կաթնամթերքի որոշ տեսակներ, թեյերի ու սուրճերի տեսակներ են, ձեթի տեսակներ, մարինացված մթերքներ, մազերի խնամքի միջոցներ, օճառ եւ այլն:
Նելլի ԲԱԲԱՅԱՆ
Դրոշմապիտակավորվող ապրանքների ցանկը` ստորեւ
| Կաթ և սերուցք` ոչ խտացված և առանց շաքարի կամ այլ քաղցրացնող նյութերի հավելման |
| Կաթ և սերուցք` խտացված կամ շաքարի կամ այլ քաղցրացնող նյութերի հավելմամբ |
| Կաթ և սերուցք` խտացված կամ շաքարի կամ այլ քաղցրացնող նյութերի հավելմամբ առանց դրանց |
| Սուրճ` բոված կամ չբոված, կոֆեինով կամ առանց կոֆեինի, սուրճի կեղև և սուրճի հատիկների թաղանթ (պատյան), սուրճի փոխարինիչներ` ցանկացած համամասնությամբ սուրճ պարունակող |
| Թեյ` համաբուրային հավելումներով կամ առանց դրանց |
| Մատե, կամ պարագվայական թեյ |
| Սոյայի ձեթ և դրա ֆրակցիաներ, ռաֆինացված կամ չռաֆինացված, սակայն առանց քիմիական բաղադրության փոփոխության |
| Գետնանուշի ձեթ և դրա ֆրակցիաներ, ռաֆինացված կամ չռաֆինացված, սակայն առանց քիմիական բաղադրության փոփոխության |
| Ձիթապտղի ձեթ և դրա խառնուրդամասեր` չզտված կամ զտված, բայց առանց քիմիական բաղադրության փոփոխության |
| Արևածաղկի ձեթ |
| Եգիպտացորենի ձեթ և դրա ֆրակցիաներ |
| Պատրաստի կամ պահածոյացված մթերքներ մսից, մսի ենթամթերքներից կամ արյունից |
| Պատրաստի կամ պահածոյացված ձուկ, թառափազգիների խավիար և դրա փոխարինիչներ` պատրաստված ձկնկիթի հատիկներից |
| Պատրաստի կամ պահածոյացված խեցգետնակերպեր, կակղամորթեր և ջրային այլ անողնաշարավորներ |
| Բանջարեղեն, մրգեր, ընկույզներ և բույսերի այլ ուտելի մասեր` պատրաստված կամ պահածոյացված քացախի կամ քացախաթթվի հավելմամբ |
| Լոլիկներ (պոմիդոր) պատրաստված կամ պահածոյացված առանց քացախի կամ քացախաթթվի |
| Սնկեր և գետնասնկեր` պատրաստված կամ պահածոյացված առանց քացախի կամ քացախաթթվի հավելման |
| Այլ բանջարեղեն` պատրաստված կամ պահածոյացված առանց քացախի կամ քացախաթթվի հավելման, սառեցված, բացի 2006 ապրանքային դիրքում նշված մթերքներից |
| Այլ բանջարեղեն` պատրաստված կամ պահածոյացված առանց քացախի կամ քացախաթթվի հավելման, չսառեցված, բացի 2006 ապրանքային դիրքում նշված մթերքներից |
| Բանջարեղեն, մրգեր, ընկույզներ, պտուղների կեղև և բույսերի այլ մասեր՝ շաքարի միջոցով պահածոյացված (շաքարի օշարակ ներծծած, շաքարահյութով պատած, շաքարահյութով եփած, շաքարած) |
| Ջեմեր, մրգային ժելե, մարմելադներ, մրգային կամ ընկույզի պյուրե, մրգային կամ ընկույզի մածուկ` ստացված ջերմային մշակման արդյունքում, այդ թվում` շաքարի կամ այլ քաղցրացնող նյութերի հավելմամբ |
| Մրգեր, ընկույզներ, և բույսերի ուտելի այլ մասեր պատրաստված կամ պահածոյացված այլ եղանակով՝ շաքար կամ այլ քաղցրացնող նյութեր կամ սպիրտ պարունակող կամ չպարունակող՝ այլ տեղում չհիշատակված կամ չներառված |
| Թեյի (պարագվայական թեյի) կամ մատեի հավելումներ և խտանյութեր, դրանց կամ թեյի, (պարագվայական թեյի) մատեի հիման վրա պատրաստված պատրաստի արտադրանք |
| Պաղպաղակ և սննդային սառույցի այլ տեսակներ, կակաո պարունակող կամ չպարունակող |
| Քացախ և դրա փոխարինիչներ` ստացված քացախաթթվից |
| Կոսմետիկ միջոցներ կամ դիմահարդարման և մաշկի խնամքի այլ միջոցներ (բացառությամբ դեղամիջոցներից), ներառյալ արևայրուքի դեմ կամ արևայրուքի համար միջոցներ, ձեռքերի կամ ոտքերի մատնահարդարման միջոցներ |
| Մազերի խնամքի միջոցներ |
| Օճառ, մակերևութային ակտիվ օրգանական նյութեր և միջոցներ, որպես օճառ կիրառվող` կտորների, քառակողիկների կամ կաղապարվածքների ձևով, օճառ պարունակող կամ չպարունակող, մակերևութային ակտիվ օրգանական նյութեր և մաշկը լվանալու համար միջոցներ՝ հեղուկների կամ քսուկների տեսքով՝ կշռաբաշխված մանրածախ առևտրի համար` օճառ պարունակող կամ չպարունակող, թուղթ, բամբակ, թաղիք կամ նրբաթաղիք (ֆետր) և չհյուսված նյութեր՝ ներծծված կամ պատված օճառով կամ լվացող միջոցով |
| Մակերևութային ակտիվ օրգանական նյութեր (բացի օճառից), մակերևութային ակտիվ նյութեր, լվացող միջոցներ (ներառյալ օժանդակ լվացող միջոցներ) և մաքրող միջոցներ` օճառ պարունակող կամ չպարունակող (բացի 3401 ապրանքային դիրքի միջոցներից) |
