Ավան եւ Նոր Նորք վարչական շրջանների ընդհանուր իրավասության դատարանի դատավոր Դավիթ Հարությունյանը կարճ ընդմիջում հայտարարեց «Հարսնաքար» ռեստորանային համալիրում բռնարարքի ենթարկված եւ մահացած Վահե Ավետյանի, նրա ընկերների գործով: Ամբաստանյալ Գարիկ Մարգարյանի պաշտպան Մարինե Թովմասյանը զգուշացրել էր, որ ուշացումով է ներկայանալու դատարան: Րոպեներ հետո պաշտպանը դատարանի աշխատակազմին տեղեկացրեց, որ չի կարող ընդհանրապես ներկայանալ նիստին եւ պատճառների մասին պատշաճ կներկայացնի հաջորդ դատական նիստի ժամանակ: Դատարանը հետաձգեց նիստը եւ հաջորդը նշանակեց փետրվարի 20-ին:
Այսօր սպասվում էր, որ պաշտպանական ճառերից հետո ռեպլիկով հանդես կգա տուժողների ներկայացուցիչ, փաստաբան Տիգրան Եգորյանը, որին կհետեւեն վերջին խոսքերը, եւ հնարավոր է՝ դատավորը մտներ խորհրդակցական սենյակ՝ ակտ կայացնելու:
Ռուզան ՄԻՆԱՍՅԱՆ
