«Բատկիվշչինա» կուսակցության առաջնորդ Արսենի Յացենյուկը Ուկրաինայի նախագահ Վիկտոր Յանուկովիչին կոչ է արել ստորագրել հունվարի 16-ին ընդունված օրենքները չեղյալ համարելու որոշումը՝ նշելով, որ դա ազդանշան կլինի, որ իշխանությունները պատրաստ են փոխզիջումների գնալ և երկրի քաղաքական ճգնաժամը կարգավորել խաղաղ ճանապարհով: Հայտնում է ուկրաինական «Ինտերֆաքս»-ը՝ հղում անելով կուսակցության մամուլի ծառայությանը:
«Որովհետև մարդիկ չեն հավատում, որ իշխանությունները պատրաստ են խաղաղ ճանապարհով կարգավորել Ուկրաինայի հակամարտությունը», – ասել է նա:
Հունվարի 28-ին Ռադայի արտահերթ նիստի ժամանակ որոշում էր ընդունվել չեղյալ համարել հունվարի 16-ին ընդունած 9-ը օրենքներ, որոնց մեջ՝ առճակատման պատճառ դարձած հավաքների ազատությունը սահմանափակող օրենքը: Խորհրդարանի նախագահ Վլադիմիր Ռիբակն արդեն ստորագրել է որոշումները, և այն պետք է արդեն լինի նախագահի սեղանին՝ ստորագրելու համար:
Պատրաստեց Հովհաննես ԻՇԽԱՆՅԱՆԸ
