Այսօր Գյումրու ավագանու նիստի ժամանակ քննարկվեց նաև քաղաքի ամենակենտրոնում՝ Սայաթ-Նովա փողոցի 9/9 ա շենքում Շիրակի մարզի առաջին ատյանի դատարանի նախագահ Էդուարդ Մանուկյանին թիվ 63 հասցեի ծառայողական բնակարանը ընդհանուր կարգով, որպես համայնքապատկան բնակտարածություն, օգտագործման տրամադրելու մասին:
Ավագանու անդամ Լևոն Բարսեղյանը զեկուցողից` Հենրիկ Գասպարյանից, հետաքրքրվեց, թե ո՞վ է Էդուարդ Մանուկյանը ու ինչո՞ւ է նրան 14 տարի առաջ տրվել ծառայողական բնակարան: Վերջինս բնականաբար իր զեկույցում չասաց, որ խոսքը դատարանի նախագահի մասին է:
Հենրիկ Գասպարյանը Լևոն Բարսեղյանի հարցին պատասխան չուներ, սակայն փոխարենը պատասխանեց քաղաքապետ Սամվել Բալասանյանը: «Էդուարդ Մանուկյանը մեր դատարանի նախագահն է, էնպես որ գիտեցեք: Ես կարող էի այդ տունը որպես ֆոնդի տուն տալ նրան, բայց կարգը պահպանեցի ու դրեցի ավագանու քննարկմանը»,- պարզաբանեց քաղաքապետը:
Լևոն Բարսեղյանը հակադարձեց` շարունակելով. «Իմ հարցը անձի դեմ չէ, եթե քաղաքը իր սեփականություն հանդիսացող բնակարանը տալիս է ապրելու, հիմքը պիտի իմանանք»:
Կարդացեք նաև
Քաղաքապետը փոխքաղաքապետ Գուրգեն Մալխասյանին տեղում հանձնարարեց բացատրել հիմքը: Վերջինս ասաց, որ երբ կառուցվել է այդ շենքը, նման հասցեով բնակարան չի եղել, այն կառուցվել է դատարանի նախագահի միջոցներով, որը 10 տարուց ավելի բարեխղճորեն օգտագործում է:
Նշենք, որ խոսքը այն շենքի մասին է , որը տարիներ շարունակ կռվախնձոր էր դարձել շատերի համար, բնակիչները երկարատև պայքար մղեցին տարբեր ատյանների դատարաներում մինչև որ կարողացան հաստատվել իրենց միջոցներով ու կոոպերատիվ հիմունքներով կառուցված շենքի բնակարաններում:
Նունե ԱՐԵՎՇԱՏՅԱՆ
