Մոսկովաբնակ Ռուդիկ Բալասանյանին մեղադրանք է առաջադրվել այն բանի համար, որ նա լիազորված անձ Սարգիս Խաչատրյանի միջոցով 2011թ. սեպտեմբերի 7-ին «իրականությանը չհամապատասխանող տվյալներ ներկայացնելով» 151. 500 ԱՄՆ դոլարին համարժեք 56.165.595 ՀՀ դրամ գումարի չափով բռնագանձման պահանջի մասին հայց է ներկայացրել Կենտրոն և Նորք-Մարաշ վարչական շրջանների ընդհանուր իրավասության դատարան` խարդախության եղանակով փորձելով հափշտակել տուժողներ Ռոլանդ Ղոնյանին և Համլետ Ալոյանին պատկանող առանձնապես խոշոր չափերի գույքը:
Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանի նախագահությամբ շարունակվող դատական նիստի ժամանակ ցուցմունք տվեց տուժող Ռոլանդ Ղոնյանը: Նա ասաց, որ տնտեսական գործունեությամբ զբաղվել է 2000 թվականից: «Լենէսք» ընկերության մեջ են եղել կինը, 2 փեսաները, հարազատները:
Ընկերությունը զբաղվել է մեքենաների շահագործմամբ, սպասարկման աշխատանքներ են կատարել, եւ ըստ տուժողի, շահույթը կազմել է 20-30 000 դոլար:
Տուժողն ասաց, որ երբ ջրմուղը հայտարարություն է արել ջրատարների վրա ՀԷԿ-երի կառուցման համար, մասնակցել են մրցույթի եւ հաղթել:
Կարդացեք նաև
Իրենք կատարել են հետախուզական, տեխնիկական աշխատանքներ, ապա դիմել են հանրային ծառայությունները կարգավորող հանձնաժողովին, որը լիցենզիան է տալիս: Ըստ տուժողի, որը նախկինում ղեկավար պաշտոններ է զբաղեցրել, եղել շրջկոմի քարտուղար, քաղկոմի անդամ, նախկին գերագույն սովետի անդամ, ներկայումս գործարար, 2004-2005-ին ստացել են լիցենզիա՝ 6 կայանների կառուցման նպատակով:
Սանկտ-Պետերբուրգում պատվիրել են հիդրոագրեգատներ, գումարներ են փոխանցել:
Տուժողն Իրանում ծանոթացել է Ռուդիկ Բալասանյանի հետ, որը տեղեկացել է իրենց ծրագրերի մասին, ասել՝ «մաքուր բիզնես է»:
Երկրորդ հանդիպման ժամանակ որոշել են միասին հավասար բաժնեմասով սկսել ՀԷԿ-երի կառուցումը: Նա հայտնեց, որ կայանը Նախիջեւանի սահմանի վրա էր, եւ հետագայում կայանների կառուցման հետ կապված հարցերով Դիմել է ՀՀ վարչապետին, ֆինանսների նախարարությանը:
Ծրագիրն ըստ տուժողի 900- 950 000 դոլար էր կազմել:
Ռուդիկ Բալասանյանը պարտավորվում է նախնական կանխիկ գումար տալ, 250 000 դոլարի չափով: Տուժողն ասաց, որ 2006թ.ապրիլի Ռ.Բալասանյանը իրեն առանց ստացականի տալիս է 80.200 դոլար գումար, հետագայում 200 000 դոլար: Տարիներ են անցնում, սակայն ըստ տուժողի, իրենք աշխատում են առանց շահույթի, իսկ գումար ներդնողն էլ անվերջ իր գումարներն է պահանջում:
Ռ.Բալասանյանի նկատմամբ տուժողն ասում է, որ ցուցաբերել է «մեծ չափով պահել ենք մարդկային էթիկան», բայց եւ փորձում է տարբեր միջոցներ գտնել Ռուդիկի գումարը տալու համար:
Ըստ նրա, իրենք պարտք էին մնացել 100 000 դոլար:
«Մտածում էինք ծեծ չլինի, ջարդ, ամոթ է, աղմուկ չլինի: Այդ ժամանակ զանգեց, թե նորմալ չեք զբաղվում ես իմ մարդը կբերեմ»,-տուժողին ասել էր Բալասանյանը:
Այդ խոսակցությունը շարունակվել էր Ղափանում, ինչը ըստ Ղոնյանի իրեն ժամկետ տալու նման էր: «Անհանգիստ էի, երեխա ունեի, թոռներ, երիտասարդ փեսա, բանականությամբ ուզում էի կարգավորվել»,-ասաց տուժողը: Ըստ նրա, ինքը պարտքը փոխանցել է գյուղնախարարի տեղակալ Վարդան Կարապետյանի միջոցով, եւ ընդհանուր 355 000 դոլար գումար է տվել Ռուդիկ Բալասանյանին, որը սակայն ասել է, թե իրեն պարտք է տուժողը 100 000 դոլար գումարը:
Ռուզան ՄԻՆԱՍՅԱՆ
