Լրահոս
Օրվա լրահոսը

Էդուարդ Շարմազանով. «Վարդան Օսկանյանը հերթական անգամ վատ դրության մեջ է գցում իր իսկ կուսակցության առաջնորդ Գագիկ Ծառուկյանին»

Փետրվար 14,2014 23:04

Պատասխանելով Վարդան Օսկանյանի՝ Հայաստանի Մաքսային միությանը անդամակցելու քննադատական ելույթի մասին հարցին` ՀՀԿ մամուլի խոսնակ Էդուարդ Շարմազանովը նշեց. «Ծանոթ եմ պատգամավոր Վարդան Օսկանյանի քննադատական ելույթին՝ կապված ՀՀ իշխանությունների իրականացրած արտաքին քաղաքականության եւ, մասնավորապես, հայ-ռուսական հարաբերությունների եւ Մաքսային միությանը Հայաստանի անդամակցման գործընթացին: Ուղղակիորեն տարակուսելի կարծիք է, որովհետեւ ինձ համար պարզ չէ. սա պատգամավոր Օսկանյանի մասնավոր կարծի՞քն է, թե ԲՀԿ պաշտոնական դիրքորոշումն է: Եթե նման հայտարարությամբ հանդես գար «Ժառանգության» կամ «Ազատ դեմոկրատների» ներկայացուցիչը, մի գուցե ընկալելի լիներ: Բայց երբ նման քննադատական հայտարարությամբ հանդես է գալիս մի կուսակցության ներկայացուցիչ, որի առաջնորդը հանդես է գալիս Մաքսային միության երկրների, այդ թվում, Բելառուսի եւ Ռուսաստանի Դաշնության հետ սերտ քաղաքական եւ տնտեսական հարաբերությունները խորացնելու ուղղությամբ, ապա այստեղ տարակուսելի է եւ հերթական անգամ ԲՀԿ պատգամավոր Օսկանյանը, իմ կարծիքով, վատ դրության մեջ է գցում իր իսկ կուսակցության առաջնորդ Գագիկ Ծառուկյանին: Ինչպես արեց պառլամենտական ընտրությունների ժամանակ, հայտնի «Վերտուի» եւ ատրճանակի պատմության ժամանակ: Երբ ամբողջ «Բարգավաճ Հայաստան» կուսակցությունը միաբերան պնդում էր, որ եղել է «Վերտու» հեռախոս, իսկ պարոն Օսկանյանը միամտաբար, ազնվորեն ասաց, որ ինքը տեսել է ատրճանակ: Թերեւս, այսքանը Օսկանյանի մասով: Կարծում եմ, որ չի ուշանա ԲՀԿ պաշտոնական դիրքորոշումը՝ կապված Մաքսային միությանը մեր անդամակցման ուղղությամբ, որը, կարծում եմ, չի համընկնի պատգամավոր Օսկանյանի կարծիքին: Եվ մենք եւս մեկ անգամ կլսենք, որ սա ընդամենը Օսկանյանի մասնավոր կարծիքն էր»:

Աշոտ ՀԱԿՈԲՅԱՆ

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (1)

Պատասխանել

  1. Արտակ says:

    ինչ կապ ունի այլ երկրների նախագաների հետ հարաբերույթյունները երկրի գեոքաղաքական ընտրության հետ համաձայն լինել-չլինելու հետ?? շատ հետաքրքիր տարամաբանություն է էս երիտհանրապետականի մոտ.. իսկ հարցը այն է, որ ԲՀԿ-ն բազմիցս՝ բազմաթիվ պատգամովրների միջոցով հայտարարել է, որ չի կարող կողմ լինել մի բանի, ինչի մասին ոչինչ հայտնի չէ.. ինչքան պետք է կրկնել այս փաստը, որ որոշները հասկանան…

Պատասխանել

Օրացույց
Փետրվար 2014
Երկ Երե Չոր Հնգ Ուրբ Շաբ Կիր
« Հուն   Մար »
 12
3456789
10111213141516
17181920212223
2425262728