Երկրապահ կամավորական միության 10-րդ համագումարի 2050 պատվիրակից ներկա էր 2041-ը, քվորումից հետո ԵԿՄ-ն սկսեց իր աշխատանքը։ Ընտրվեցին նախագահության, քարտուղարության, հաշվիչ և խմբագրական հանձնաժողովներ։ Նախագահության անդամներ նշանակվեցին Մանվել Գրիգորյանը, Սեյրան Սարոյանը, Տարոն Մարգարյանը, Իշխան Զաքարյանը, Արթուր Աղաբեկյանը և այլք։
«Սա լուրջ օր է, մեր երկրի, մեր պետության համար: 25 տարի առաջ մեր երկրի ղեկավարի շնորհիվ կարողացանք անկախանալ, անկախություն ձեռք բերել, Արցախը պաշտպանել: Այսօր այնքան բան ունենք, որ սաղ աշխարհով ուզում են, բայց չենք տալիս»,- ասաց գեներալ Մանվել Գրիգորյանը: Նրա խոսքով, պատերազմի տարիներից ԵԿՄ-ն կարևոր ներդրում է ունեցել հայոց անկախության համար. «Երկրապահ նշանակում է, երկիր ստեղծող, երկիր պահող, երկիր շենացնող: Երկրապաշտությունը, երկրապահական մտածողությունը մեր ազգի ողնաշարն է: Մենք մեր մարտական ընկերների պատգամ ունենք՝ պահպանել ազատ, անկախ Արցախը, վստահ եղեք երկրապահն իր առաքելությունը կատարել է , կատարում է և կատարելու է: Արցախն այլևս անկախ պետություն է»:
Մանվել Գրիգորյանը կրկնեց. «Կարևորը ոչ միայն ձեռք բերելն է, այլև այն պահպանելն ու նոր սերնդին փոխանցելը: Մեզ հաջողվեց օրենքով ամրագրել «Երկրապահ» կամավորների կարգավիճակը: Եթե ուզում եք, որ պատերազմ չկրկնվի, ապա թշնամուց ուժեղ բանակ պիտի ունենանք: Հայկական բանակում ծառայելը հայ մարդու համար պիտի դառնա պատվի խնդիր, իսկ Հայկական բանակի սպան մեր հասարակության ամենապաշտպանված ու հարգարժան խավը պիտի լինի»:
Ըստ գեներալի՝ բոլոր խնդիրներին բոլորից լավ տեղյակ է ՀՀ նախագահը: Նա ասաց, որ հավատում ու վստահում են Սերժ Սարգսյանին. «Դուք մեր մարտական ընկերն եք, մենք համոզված ենք, որ ջանք ու եռանդ չեք խնայելու, որ կառուցեք հզոր, զարգացած Հայաստան, որտեղ պաշտպանված կլինեն հայրենիքի սահմանները և որտեղ բարեկեցիկ խաղաղ կյանքով կապրի հայ ժողովուրդը…Եթե մեզանից յուրաքանչյուրը չի մտածում, որ այս երկրի ճակատագիրը ինչ-որ չափով իրենից է կախված, որ մենք ենք մեր տունը կառուցելու ու շենացնելու, ուրեմն միասնաբար ու համախմբված իրականացնենք մեր բոլոր ծրագրերը։ Համախմբվենք ու միասնական լինենք, որպեսզի հարկադրենք Թուրքիային ճանաչել 20-րդ դարասկզբի Հայոց ցեղասպանության փաստը։ Համախմբվենք ու միասնական լինենք, որպեսզի պահպանենք ու հզորացնենք Հայաստանն ու Արցախը»:
Կարդացեք նաև
Արփինե ՍԻՄՈՆՅԱՆ
