Քիչ առաջ ԱԺ նախագահ Հովիկ Աբրահամյանի մոտ ավարտվել է «գազի հարցով» ժամանակավոր հանձնաժողով ստեղծելու հարցով քննարկումը, որին մասնակցել են իշխանական եւ ոչ իշխանական ուժերի ներկայացուցիչները: Aravot.am-ի հետ զրույցում ՀՀԿ խմբակցության քարտուղար Հովհաննես Սահակյանն ասաց, որ ստեղծվելիք հանձնաժողովն առավել ընդգրկուն իրավասություններ կունենա, քան առաջարկում էր ընդդիմությունը. «Սակագնի ձեւավորում, պարտքերի ձեւավորում եւ մնացյալ այլ հարցերն ուսումնասիրելու իրավասու կլինի»:
Հիշեցնենք, որ նախորդ քառօրյայում քաղաքական մեծամասնությունը մերժեց ոչ իշխանական ուժերի առաջարկը՝ «գազի հարցով» ժամանակավոր հանձնաժողով ստեղծելու մասին, որը պետք է ուսումնասիրեր 300 միլիոն պարտքի գոյացման աղբյուրը, սակագնի ձեւավորման հարցը եւ «ՀայՌուսգազարդի» 20 տոկոս բաժնեմասի վաճառքի հարցը: Այնուհետեւ Հովիկ Աբրահամյանը հայտարարեց, որ հանձնաժողովը կստեղծվի, արդեն մեծամասնության նախաձեռնությամբ եւ կտա բոլ;որ հարցերի պատասխանները:
Այսօրվա քննարկման ժամանակ խորհրդարանական ուժերը հստակ պատասխաններ չեն տվել՝ նախագիծը դեռ պետք է քննարկեն խմբակցություններում, սակայն, անցած քառօրյայի ավարտին հաջորդած խորհրդարանական ճեպազրույցներում, ըստ էության, կողմ էին արտահայտվել հանձնաժողովի ստեղծմանը:
Նելլի ԳՐԻԳՈՐՅԱՆ
Կարդացեք նաև
