Հարցազրույց «Մշակույթների երկխոսություն» հիմնադրամի
նախագահ Սոնա Հարությունյանի հետ
– «Մշակույթների երկխոսություն» հիմնադրամը ստեղծվել է 2012թ. եւ կարճ ժամանակահատվածում իրականացրել է արդեն 11 նախագիծ, որոնցից 9-ը միջազգային են: Ո՞րն էր առաջին իրականացված նախագիծը:
-2012թ. հուլիսի 13-ին Երեւանի Ժամանակակից արվեստի թանգարանում բացվեց նկարիչ Տիգրան Սահակյանի անհատական ցուցահանդեսը: Նախագծի շրջանակներում հիմնադրամի կողմից նկարահանվել է կարճամետրաժ ֆիլմ, որը պատմում է նկարչի ստեղծագործական ընթացքի մասին եւ տպագրվել է նրա առաջին անհատական ցուցահանդեսի պատկերագիրքը: Վերջինիս արվեստաբանական հոդվածը հեղինակել է նկարիչ-արվեստաբան Արա Հայթայանը:
– Իսկ ո՞րն էր միջազգային մակարդակի առաջին նախագիծը, որում ստանձնել եք կոմիսարի պարտականությունները:
Կարդացեք նաև
– 2012թ. սեպտեմբերին նորաստեղծ հիմնադրամի նախաձեռնությամբ եւ ՀՀ մշակույթի նախարարության աջակցությամբ առաջին անգամ Հայաստանը մասնակցեց Պեկինի 5-րդ միջազգային բիենալեին՝ «Հատուկ ցուցահանդես» ձեւաչափով: Ցուցահանդեսի համադրողն էր նկարիչ-արվեստաբան Արա Հայթայանը, ցուցահանդեսում ընդգրկված էր 11 հայ նկարիչ եւ քանդակագործ, որոնք հանդես էին գալիս երեքական աշխատանքով: Այնուհետեւ 2012թ. հոկտեմբերին Լեհաստանում, Վարշավայի «Թագավորական պալատում» մեր հիմնադրամը ներկայացրեց արվեստագետ Նարեկ Ավետիսյանին եւ նրա Simulacrum նախագիծը:
– Հիմնադրամի գործունեության հիմնական ուղղությունը գեղանկարչությա՞ն ոլորտն է:
– Ոչ միայն: Սակայն, որպես առաջնային ուղղություն մենք դիտարկում ենք հայ ժամանակակից արվեստը՝ կերպարվեստը: 2013թ. օգոստոսին Վարշավայի «Թագավորական պալատի» ամենամյա «Թագավորական կամարներ» հանրաճանաչ միջազգային փառատոնին «Մշակույթների երկխոսություն» հիմնադրամի նախաձեռնությամբ Արամ Խաչատրյանի 110-ամյա հոբելյանի կապակցությամբ կայացավ Հայաստանի վաստակավոր արտիստ, դաշնակահար Հայկ Մելիքյանի մենահամերգը: 2013թ. նոյեմբերի 15-ից դեկտեմբերի 1-ը Էստոնիայի մայրաքաղաք Տալլինի 17-րդ ամենամյա «Սեւ գիշերներ» միջազգային կինոփառատոնին էլ հիմնադրամը հանդես եկավ «Նոր ձայներ հայկական կինոյում» առանձին ծրագրով: Ներկայացվեց հայկական 17 ֆիլմ: Ծրագրի համադրողներն էին՝ ռեժիսոր Դիանա Կարդումյանը եւ կինոքննադատ Վիգեն Գալստյանը:
– Եթե գաղտնիք չէ, ո՞րն է նոր տարվա առաջին ամիսներին նախատեսված ծրագիրը:
– Այսօր Գերմանիայի Սաքսոնիա-Անհալտ երկրամասի Մորիթցբուրգի թանգարանում «Մշակույթների երկխոսություն» հիմնադրամի նախաձեռնությամբ, Սաքսոնիա-Անհալտ երկրամասի եւ ՀՀ մշակույթի նախարարությունների հետ համագործակցությամբ տեղի կունենա «Մինաս եւ Նարեկ Ավետիսյան. Մոդեռնը եւ Ավանգարդը Հայաստանում. Սերունդների երկխոսություն» լայնածավալ ցուցահանդեսի բացումը: Կհրատարակվի ցուցահանդեսի ընդգրկուն, եռալեզու պատկերագիրքը: Վերջինիս արվեստաբանական հոդվածների հեղինակներն են արվեստագիտության դոկտոր, պրոֆեսոր Վիլհեմ Շլինկը եւ արվեստագիտությունների թեկնածու տիկին Մարի-Քրիստին Ֆրիտչը: Ցուցահանդեսը բաց կլինի արվեստասեր հասարակության համար մինչեւ մայիսի 4-ը: Նշված ժամանակահատվածում «Մշակույթների երկխոսություն» հիմնադրամի առաջարկով Մորիթցբուրգի թանգարանում եւ Հալլե քաղաքի կինոդահլիճներից մեկում կցուցադրվեն հայկական ժամանակակից ֆիլմեր, որոնց շարքում են նաեւ Էդգար Բաղդասարյանի «Սուրբ ծեսերի երկիրը» եւ «Արարատից Սիոնը»:
Զրուցեց ՎԻԿՏՈՐՅԱ ՓՈՇՈՏՅԱՆԸ
«Առավոտ» օրաթերթ
