Հայաստանի զինված ուժերի սպա, լեյտենանտ Գուրգեն Մարգարյանի սպանության տասներորդ տարելիցի կապակցությամբ ԱՄՆ-ի կոնգրեսականներ Ադամ Շիֆը, Դեյվիդ Սիլիլինն ու Հայկական հարցերով կոնգրեսական հանձնախմբի համանախագահ, կոնգրեսական Ֆրենք Փալոունը դատապարտել են Ադրբեջանի կառավարության կողմից լեյտենանտ Գուրգեն Մարգարյանի սպանությունն իրականացրած Ռամիլ Սաֆարովին ներում շնորհելու, պարգևատրելու և վերջինիս արարքը գովաբանելու փաստը:
ԱՄՆ-ի կոնգրեսականները, ըստ Ամերիկայի Հայ դատի հանձնախմբի հաղորդագրության, միացել էին «Ֆեյսբուք», «Թվիթեր» և «Ինստագրամ» սոցիալական ցանցերում ԱՄՆ-ի և Կանադայի Հայկական երիտասարդական դաշինքի առաջնորդությամբ մեկնարկած՝ Սաֆարովի կողմից Մարգարյանի կացնահարմամբ իրականացված սպանության մասին իրազեկության բարձրացմանն ուղղված արշավին:
Այսպես, «Թվիթեր» սոցիալական կայքում ստեղծված՝ Սաֆարովի կողմից Գուրգեն Մարգարյանի սպանության գործով արդարություն պահանջող էջը կրում է «#Justice4Margaryan», թարգմանաբար՝ «Արդարություն՝ հանուն Մարգարյանի» անվանումը:
«Թվիթեր»-ի իր էջում հրապարակված հաղորդագրության մեջ կոնգրեսական Ադամ Շիֆը գրել է. «Ադրբեջանցի զինծառայող Ռամիլ Սաֆարովին երբեք չպետք է ներում շնորհվեր Հայաստանի բանակի սպայի գազանաբար սպանության համար: Սարսափելի է: #Justice4Margaryan»:
Կարդացեք նաև
ԱՄՆ-ի կոնգրեսական Դեյվիդ Սիսիլինը «Թվիթեր»-ի իր էջում գրել է, որ «Լեյտենանտ Գուրգեն Մարգարյանի դաժան սպանության 10-րդ տարելիցի օրը մենք հարգում ենք նրա հիշատակը և կրկին պարտավորություն ենք սատարել #Justice4Margaryan-ը»:
Հայկական հարցերով կոնգրեսական հանձնախմբի համանախագահ, կոնգրեսական Ֆրենք Փալոունի կողմից «Թվիթեր»-ում հրապարակված հաղորդագրությունը համահունչ է իր գործընկերներ Շիֆի և Սիսիլինի հաղորդագրություններին:
«Ադրբեջանցի լեյտենանտ Ռամիլ Սաֆարովի կողմից իրականացված սպանությունից 10 տարի անց մենք շարունակում ենք պահանջել #Justice4Margaryan-ը: Սաֆարովը պետք է պատասխանատվության ենթարկի իր հանցագործության համար», – «Թվիթեր»-ի իր էջում գրել է կոնգրեսական Փալոունը:
Մանրամասները կարող եք կարդալ` «Ամերիկայի ձայն»-ի կայքում
