«Միացյալ Նահանգները շատ մտահոգված է հայ-ադրբեջանական ուժերի շփման գծում լարվածության աճի կապակցությամբ»,- «Թրենդ» ադրբեջանական գործակալությանը տված ծավալուն հարցազրույցում հայտարարել է Ադրբեջանում Միացյալ Նահանգների դեսպան Ռիչարդ Մորնինգսթարը` կոչ անելով Ադրբեջանին և Հայաստանին խուսափել իրավիճակի սրացումից:
«Ըստ էության, դա վնասում է խաղաղ գործընթացին, բացի այդ՝ մշտապես կարող են լինել անկանխատեսելի հետևանքներ և սխալ հաշվարկներ, որ կարող են հանգեցնել ավելի մեծ ռազմական գործողությունների»,- հայտարարել է Միացյալ Նահանգների դեսպանը:
Մորնինգսթարի խոսքով` լավագույն և միակ միջոցը, որով կարող է լուծվել հակամարտությունը, երկու նախագահների հանդիպումների միջոցով կոնկրետ քայլերի քննարկումն ու հռչակագրի պատրաստումն է, որը կարտացոլի ադրբեջանցիների և հայերի շահերը:
«Միևնույն ժամանակ մեզ որոշ չափով հուսադրում է, որ ներկայումս իրավիճակի սրացման միտումը փոքր-ինչ նվազել է, և այժմ ավելի քիչ միջադեպեր են գրանցվում, քան շաբաթներ առաջ, երբ սահմանային միջադեպերի հեղեղ էր: Մենք ոգևորված էինք նոյեմբերին երկու երկրների նախագահների հանդիպումով, մենք կարծում ենք, որ այս հանդիպումները կշարունակվեն»,- ասել է նա։
Կարդացեք նաև
Ղարաբաղյան հակամարտությունից բացի, Ադրբեջանում Միացյալ Նահանգների դեսպանն անդրադարձել է նաև շատ այլ հարցերի, սկսած էներգետիկ ոլորտից մինչև ադրբեջանաամերիկյան հարաբերությունները:
Ռիչարդ Մորնինգսթարը հայտարարել է, որ Միացյալ Նահանգները բարձր է գնահատում Ադրբեջանի հետ ռազմավարական գործընկերությունը.- «Ամենաշատը մենք ցանկանում ենք օգնել` պաշտպանելու Ադրբեջանի անկախությունն ու ինքնիշխանությունը, դա շատ կարևոր է: Մենք մի շարք ընդհանուր շահեր ունենք, որ ներառում են ժողովրդավարական և տնտեսական բարեփոխումների իրականացումը, անվտանգության համակարգի ռեֆորմները, Լեռնային Ղարաբաղի հակամարտության լուծման, Աֆղանստանի, ահաբեկչության դեմ պայքարի հետ կապված հարցեր»:
ԱՄՆ դեսպանի խոսքով Միացյալ Նահանգներն ու Ադրբեջանն ընդհանուր շահեր ունեն նաև էներգետիկայի ոլորտում:
Մանրամասները կարող եք կարդալ` «Ազատություն» ռ/կ-ի կայքում
