Մարտի 9-ին Տավուշի մարզի Նոյեմբերյանի տարածաշրջանի Զորական եւ Դեբեդավան գյուղերում կկայանան տեղական ինքնակառավարման մարմինների ընտրություններ: Այդ գյուղերում ապրում են Ադրբեջանից բռնագաղթած մեր հայրենակիցները: 1050 բնակիչ ունեցող Զորականում գրանցված է համայնքի ղեկավարի 2 թեկնածու՝ գործող գյուղապետ, ՀՀԿ անդամ 33-ամյա Սուրեն Մարտիրոսյանը եւ անկուսակցական, 33-ամյա Գուրգեն Բաղիրյանը: Մեր տեղեկություններով՝ Գուրգեն Բաղիրյանը Սուրեն Մարտիրոսյանի ընկերն է եւ առաջիկա օրերին կհանի իր թեկնածությունը: Զորական համայնքի ավագանու 5 տեղի համար գրանցվել է 6 թեկնածու, որից 2-ը ՀՀԿ, մեկը՝ ՀՅԴ անդամ է, մնացածներն՝ անկուսակցական:
638 բնակիչ ունեցող Դեբեդավանում համայնքի ղեկավարի թեկնածու են գրանցված գործող գյուղապետ, անկուսակցական, 54-ամյա Վանյա Դամիրչյանը եւ ՀՀԿ անդամ, ոչ մի տեղ չաշխատող, 55-ամյա Ֆեդյա Էլչիբեկյանը: Դեբեդավանի ավագանու 5 տեղին հավակնում է 7 հոգի, որից 5-ն անկուսակցական է, 2-ը՝ ՀՀԿ անդամ: Ուշագրավ է , որ ավագանու անդամության թեկնածու առաջադրված ՀՀԿ անդամները հարազատ եղբայրներն են՝ 1967թ. ծնված Ավանես Դարգինյանը եւ 1963թ. ծնված Սեյրան Դարգինյանը: Սակայն առաջինի հայրանունը փաստաթղթերում նշված է «Յուրա», երկրորդինը՝«Յուրի»:
Ոսկան ՍԱՐԳՍՅԱՆ
