«Աղջիկը լուսնի վրա» պարային ներկայացման պրեմիերան այլևս կայացած է: Ներկայացումը, որի բալետմայստերն է Արինա Արարատյանը, ինքնատիպ էր նրանով, որ ցույց էր տալիս, թե ինչպես կարող են ֆիզիկական խնդիրներ ունեցող մարդիկ լիովին ինտեգրվել առօրյա կյանքում: Հաշմանդամության խնդրիրներին նվիրված այս միջոցառումը կազմակերպվել է ԱՄՆ դեսպանատան և «Կյանքը առանց սահմանների» ծրագրի նախաձեռնությամբ:
Ծրագիրը նպատակ ունի փոխել ընկալումները, որ գոյություն ունեն հասարակության մեջ հաշմանդամություն ունեցող անձանց վերաբերյալ և երկխոսություն ծավալել այդ հարցերի շուրջ: «Աղջիկը լուսնի վրա» ներկայացումն առանձնանում է նրանով, որ դրա մեջ միասին կողք կողքի հանդես են գալիս հաշմանդամություն ունեցող և չունեցող պարողներ:
«Մի շատ հստակ և պարզ ուղերձ է պարունակում այս միջոցառումը. երբ հասարակությունը ներառական է, նրանում կա բազմազանություն: Դա նշանակում է, որ երկիրը, հասարակությունը, ժողովուրդն ավելի ուժեղ և ավելի ամուր են»,– կարծում է ՀՀ-ում ԱՄՆ դեսպան Ջոն Հեֆերնը, ով նույնպես ներկա էր միջոցառմանը:
Ներկայացմանը նախորդեց ֆիզիկական խնդիրներ ունեցող նկարիչների ստեղծագործությունների ցուցահանդեսը, որտեղ ներկայացված են աշխատանքներ՝ պատկերող հաշմանդամություն ունեցող անձանց դժվարությունները և առօրյա կյանքը: Նկարների հեղինակներից Հեպինյան Շուշանը, ով ունի միայն մեկ ձեռք և այդպես է նկարում, ասում է, որ իր համար ներշնչանքի աղբյուր են Շառլ Ազնավուրի երգերը, ինչպես նաև բնությունը և գույները:
Ինչպես «Աղջիկը լուսնի վրա» ներկայացումը, այնպես էլ նկարների ցուցահանդեսը կտևի 2 օր՝ փետրվարի 26-ին և 27-ին:
Աննա ԽԱՉԱՏՐՅԱՆ
