Նախկինում «Դիլիջան» ազգային պարկի տարածքը կազմել է 28 հազար հեկտար: Ազգային պարկի տնօրեն Աշոտ Դավթյանը հայտնեց, որ 2006թ. կատարված քարտեզագրման աշխատանքների արդյունքում ազգային պարկի հարակից տարածքները, որոնք չէին հսկվում այլ կազմակերպությունների կողմից եւ բուֆերային գոտու մի մասը միացվել է ազգային պարկին, պարկի տարածքը դարձել է 33 հազար 765 հա, որի 10 տոկոս տարածքը արգելոցային գոտի է: Արգելոցները գտնվում են բնակավայրերից հեռու, դրանց վրա մարդկային ազդեցության գործոնը փոքր է:
Ազգային պարկի «զարդը» Աղավնավանքի կենու պուրակն է, այն Կովկասում եզակի է: Աշոտ Դավթյանի վկայությամբ՝ սովորական սղոցը չի կարող հատել կարմրափայտը, այն շատ ամուր է: Կենու 25 հեկտարանոց պուրակն իր նշանակությամբ համարժեք է ազգային պարկի մնացած տարածքներին: Աղավնավանքի կենու պուրակը ցանկապատված է եւ մշտապես հսկվում է ազգային պարկի աշխատակիցների կողմից :
Ոսկան ՍԱՐԳՍՅԱՆ
