Այսօր՝ մարտի 11-ին, տեղի ունեցավ Եվրամիության կողմից ֆինանսավորվող «Թիրախային նախաձեռնություն Հայաստանի համար» ծրագրի շրջանակներում Վերաինտեգրման ուղղորդման կենտրոնի բացման արարողությունը: Ներկա էին Հայաստանում ԵՄ պատվիրակության ղեկավար, դեսպան Տրայան Հրիսթեան եւ ՀՀ տարածքային կառավարման նախարարության միգրացիոն պետական ծառայության պետ Գագիկ Եգանյանը:
Կենտրոնը պետք է օգնի Հայաստան վերադարձած ՀՀ քաղաքացիներին՝ վերաինտեգրվելու հնարավորությունների մասին տեղեկատվություն տրամադրելով: Կենտրոնին դիմողները պետք է ունենան այլ երկրում ապրած տարիների մասին փաստաթուղթ, երբ է գնացել, երբ վերադարձել:
Իր խոսքում՝ միգրացիոն պետական ծառայության պետ Գագիկ Եգանյանը նշեց, որ ներգաղթողների ինտեգրման հարցին պետությունը մեծ ուշադրություն է դարձնում, 2011 թվականին Եվրամիության հետ Արեւելյան գործընկերության շրջանակներում կնքված Շարժունակության հռչակագիրը նույնպես միտված է միգրացիոն խնդիրների լուծմանը:
«Վերադարձի գործընթացը դյուրին ընթացողներից չէ, այն հաճախ ուղեկցվում է լուրջ սթրեսներով: Այս ամենով պայմանավորված՝ վերադարձողները նորից գնում են երկրից»,- ասաց նա՝ հույս հայտնելով, որ նոր բացված կենտրոնը կօգնի քաղաքացիներին վերաինտեգրվելու հարցում:
Կարդացեք նաև
«Որպեսզի կանխարգելվի, իրոք շատ կարեւոր է այդ պահին նրանց կողքին գտնվելը»,- ասաց նա:
Գագիկ Եգանյանը նշեց նաեւ. «Վերջին մի քանի տարիներին միգրացիայի ոլորտում Հայաստան-Եվրամիություն հարաբերություններում ձեւավորվել է համագործակցության ընդարձակ օրակարգ: Այն իր մեջ ներառում է համապատասխան իրավատնտեսական բազան»: Ըստ պարոն Եգանյանի՝ այսօր Հայաստանում ԵՄ-ի ֆինանսավորմամբ միգրացիոն ոլորտում իրականացվում է 8 ծրագիր:
ԵՄ դեսպան Տրայան Հրիսթեան նույնպես հիշատակեց Շարժունակության հռչակագիրը. «Գործընկերության հռչակագրի լույսի ներքո պարզ է դառնում, թե որքան է ԵՄ-ն կարևորում Հայաստանում միգրացիոն հոսքերի կառավարումը, պարզ է նաև, թե ինչ աջակցություն է ցուցաբերվում այդ գործընթացին»:
Ծրագիրն իրականացվում է Ֆրանսիայի միգրացիայի եւ ինտեգրման գրասենյակի կողմից:
Հռիփսիմե ՀՈՎՀԱՆՆԻՍՅԱՆ
