Ինչպես միշտ Ժիրինովսկին հիմարություններ է դուրս տալիս և պետք չէ ուշադրություն դարձնել նրա խոսքերին, ադրբեջանցի քաղաքագետ և պատգամավոր Ռասիմ Մուսաբեկովն ասել է «Հաքքին.ազ» լրատվականին՝ անդրադառնալով Վլադիմիր Ժիրինովսկու հայտարարությանը, թե Ղարաբաղի հակամարտությունը լուծելու համար այն պետք է միացնել Ռուսաստանին:
«Բայց եթե ենթադրենք, որ Ռուսաստանի իշխանությունները նրա շուրթերով հնչեցնում են իրենց ծրագրերը, ապա տրամաբանական կլիներ, որ ինքը հայտներ Ադրբեջանը և Հայաստանը Ռուսաստանին միացնելու մասին, քանի որ Ղարաբաղի միացումը հնարավոր չէ աշխարհագրորեն, ինչպես Մերձդնեստրինը», – ասել է Մուսաբեկովը՝ նշելով, որ Ժիրինովսկու հայտարարությունն արված է Ղրիմում Ռուսաստանի գործողությունները արդարացնելու ֆոն ստեղծելու համար:
Մեկ այլ քաղաքագետ՝ Զարդուշտ Ալիզադեն կարծում է, որ այդ հայտարարությունը հասարակության տրամադրությունները ստուգելու համար է:
Կարդացեք նաև
«Ռուսկայա սլուժբա նովոստեյ» ռադիոկայանին տված հարցազրույցում լիբերալ-դեմոկրատական կուսակցության առաջնորդ Ժիրինովսկին ասել էր, որ Հայաստանն ու Ադրբեջանը Ղարաբաղի հարցում երբեք համաձայնության չեն գա, այդ պատճառով «լավագույն լուծումը այն Ռուսաստանի կազմի մեջ ընդգրկելն է» և ավելացրել, որ դրանից «հայերը չեն նեղանա, իսկ ադրբեջանցիները ստիպված կհամակերպվեն»:
Պատրաստեց Հովհաննես ԻՇԽԱՆՅԱՆԸ
