Ինչպես ավելի վաղ տեղեկացրել էինք՝ շրջանառվող լուրերի համաձայն ՝որպես Գորիսի քաղաքապետի թեկնածու, նեղ շրջանակներում շրջանառվում է ռադիոէլեկտրոտեխնիկական սարքերի արտադրությամբ զբաղվող «Գորիսի Գամմա» ԲԲԸ գործադիր տնօրեն Տիգրան Կարապետյանի անունը:
Փորձեցինք Տիգրան Կարապետյանից ճշտել, թե որքանո՞վ են հավաստի այս տեղեկությունները եւ արդյոք մտադի՞ր է Գորիսում հունիսին կայանալիք համայնքի ղեկավարի ընտրություններին առաջադրել իր թեկնածությունը: «Ո՛չ հաստատում եմ, ո՛չ ժխտում այդ տեղեկությունը: Դրա մասին խոսելը դեռ վաղ է, ժամանակը ցույց կտա, ես այս պահին իմ բիզնեսով եմ զբաղված», – փոխանցեց Տիգրան Կարապետյանը:
Մեզ հասած տեղեկություններով՝ Տիգրան Կարապետյանը լավ հարաբերություններ ունի ներկայիս մարզպետ Վահե Հակոբյանի հետ եւ ըստ ամենայնի, մարզպետը սատարելու եւ նրա առաջադրման կողմնակիցն է լինելու:
«Պարոն Հակոբյանի հետ ընկերներ ենք, իմ առաջադրվելու կամ չառաջադրվելու հարցում, իհարկե, կարևոր է նաեւ մարզպետի որոշումը: Դեռ վաղ է խոսել, կգա ժամանակը, ամեն ինչ հստակ կլինի, դրա մասին առաջինը լրագրողները կիմանան», – ասաց երիտասարդ գործարարը:
Կարդացեք նաև
Իսկ մեր այն հարցին, թե ի՞նչ հարաբերությունների մեջ է Սուրիկ Խաչատրյանի հետ, որքանո՞վ են համապատասխանում իրականությանը տարածված այն լուրերը, որ վերջինս Սյունիքի նախկին մարզպետի թիմակիցներից չէ, նույնիսկ՝ հակառակ ճամբարի ներկայացուցիչ է, զրուցակիցս պատասխանեց. «Չգիտեմ ինչ նկատի ունեք հակառակ ճամբար ասելով, ես բիզնեսի մարդ եմ, վերջին տարիներին զբաղվել եմ իմ բիզնեսով, «Գորիսի Գամմա» ԲԲԸ գործադիր տնօրենն եմ, Սյունիքի մարզի առեւտրաարդյունաբերական պալատի նախագահը, նախկին մարզպետի հետ որեւէ հարաբերություն, որեւէ շփում որպես այդպիսին չեմ ունեցել», – ավելացրեց Տիգրան Կարապետյանը:
Նշենք, որ հունիս ամսին Գորիսում համայնքի ղեկավարի հերթական ընտրությունն է նշանակված: Վերջին 14 տարիներին Գորիսում քաղաքապետ չի փոխվել, 2000 թվականից մինչեւ օրս համայնքը ղեկավարել է ներկայիս քաղաքապետ, ՀՀԿ-ական Նելսոն Ոսկանյանը:
Մերի ՍՈՂՈՄՈՆՅԱՆ
