Նախախորհրդարանի անդամ Ալեք Ենիգոմշյանն այսօր Նախախորհրդարանի գրասենյակում ներկայացրեց «Նոր որակի պետության» ազգային ռազմավարական իրենց հայեցակարգի՝ պահանջատիրություն եւ Հայաստան- Սփյուռք հարաբերությունների ներկային ու մարտահրավերներին վերաբերող ծրագիրը:
Ծրագրի հիմքում հայ ժողովրդի համախմբումն է պատմական հայրենիքում եւ այդ տարածքում ազատ ինքնորոշման հնարավորության ձեռքբերումը:
«Հայաստանը լուրջ վտանգների է ենթակա հայանուն մարդկանց վարած քաղաքականության պատճառով, դրա համար թե՛ Հայաստանում, թե՛ արտասահմանում բնակվող հայերի առաջնահերթ պարտականությունը պետք է լինի այսօրվա մեր ապրող հայրենիքը դուրս բերել վտանգված իրավիճակից, այս հայրենիքը դարձնել առողջ, իսկական հայկական պետություն, որտեղ հայերը օտարված չեն զգա իրենց պետությունից ու հողից»,- ասաց պարոն Ենիգոմշյանը:
Նրա խոսքով, իրենք դատապարտում են ցանկացած քաղաքականություն, որը կարող է վնասել Հայաստանի հզորացմանը. «Զիջումներն ու պարտվողական քաղաքականությունը մերժելի են: Անընդունելի է այն կեցվածքը, որն ասում է, թե այսօրվա անվտանգության շահերից ելնելով՝ Հայաստանը պետք է զիջումների գնա Թուրքիայի կամ այլ պետությունների հետ: Այսօրվա Հայաստանի անվտանգությունը պահանջում է անզիջում կեցվածք ցուցաբերել: Հայաստանն իրավունք չունի հարակից պետությունների՝առաջին հերթին Թուրքիայի նկատմամբ ցուցաբերել պարտվողական կամ զիջողական դիրքորոշում՝ լինի պատմական ճշմարտության ճանաչման, դատապարտման կամ սահմանային հարցերում»:
Կարդացեք նաև
Անդրադառնալով Նախիջեւանի եւ Արցախի հիմնահարցին, ասաց՝ այդ հարցերը դիտարկում են որպես մեկ ամբողջական խնդիր եւ լուծումը տեսնում են իրավունքների վերականգնման ճանապարհով. «… Բոլոր հարցերի պատասխանը պետք է գտնել ցեղասպանության հետեւանքների վերացման ճանապարհով»:
Ինչ վերաբերում է Հայաստան- Սփյուռք հարաբերություններին, Նախախորհրդարանը գտնում է, որ Հայաստանն ու Սփյուռքը պետք է համախմբվեն ու աշխատեն միասնական ներուժով:
Արփինե ՍԻՄՈՆՅԱՆ
