Լրահոս
Օրվա լրահոսը

Եվրոպական միության ֆինանսավորմամբ փոքր դրամաշնորհներ կտրամադրվեն ԶԼՄ-ներին եւ քաղաքացիական հասարակության կազմակերպություններին

Մարտ 18,2014 22:14

Այսօր Կապանում Սյունիքի մարզի  քաղաքացիական հասարակական կազմակերպությունների ներկայացուցիչների եւ ԶԼՄ-ներկայացուցիչների համար իրազեկման սեմինար էր կազմակերպվել, որտեղ ներկայացվել է «Հայաստանի երիտասարդ իրավաբանների ասոցիացիա» և գործընկեր «Ինֆորմացիայի ազատության կենտրոն» հասարակական կազմակերպությունների կողմից իրականացվող «Կոռուպցիայի դեմ պայքարի բազմակողմանի խթանում» ծրագիրը։ 2014թ.-ի հունվարից մեկնարկած ծրագիրը ֆինանսավորվում է Եվրոպական միության կողմից եւ  կավարտվի 2016թ.-ի դեկտեմբերին: Եռամյա ծրագիրը  նպատակ ունի մեծացնել քաղաքացիական հասարակության կազմակերպությունների դերը հակակոռուպցիոն բարեփոխումների խթանման եւ իրականացման գործում։  Ծրագրի օգնական Նվարդ Լոռյանի խոսքով` ծրագրի շրջանակներում ՔՀԿ-ներին եւ ԶԼՄ-ներին տրամադրվելու են  փոքր դրամաշնորհներ, կոռուպցիոն թեմաների վերաբերյալ  մոնիթորինգներ, լրատվական հետաքննություն իրականացնելու համար եւ այլն:

«Այս ծրագիրը շարունակում է  մեր նախորդ հակակոռուպցիոն ծրագիրը, որը տրամադրում էր անվճար իրավաբանական խորհրդատվություն եւ ներկայացուցչություն դատարաններում: Այս ծրագրով  նախատեսում ենք ստեղծել հակակոռուպցիոն մարմին եւ հակակոռուպցիոն կոալիցիա, որը բաղկացած կլինի ՔՀԿ-ներից եւ  ԶԼՄ-ներից, որոնք իրենց մասնակցությունը կունենան կոռուպցիայի դեմ պայքարի գործում: Ծրագրի շրջանակներում նախատեսվում է զարգացնել ՔՀԿ-ների կարողությունները, բարձրացնել հասարակական կազմակերպությունների վերահսկողությունը, ստեղծել կայուն երկխոսություն կառավարության եւ ՔՀԿ-ների միջեւ եւ այլն»,- նշեց ծրագրի օգնական Նվարդ Լոռյանը եւ տեղեկացրեց, որ ծրագրի ավարտին նախատեսվում է արդյունքների հիման վրա մշակել քաղաքականություն և ներկայացնել կառավարություն։

eu1

Ծրագրի տարածաշրջանային փորձագետ, «Հայաստանի երիտասարդ իրավաբանների ասոցիացիա» ՀԿ-ի Սյունիքի մարզային մասնաճյուղի նախագահ Արշավիր Խալափյանը նշեց, որ Սյունիքում մարդիկ սրտացավ են,  անտարբեր չեն բացասական երեւույթների նկատմամբ, այդ թվում նաեւ կոռուպցիոն դրսեւորումների նկատմամբ: «Եթե նայում ենք համապետական ընտրությունների արդյունքները, տեսնում ենք,  որ ժողովուրդն այդքան էլ հուսահատ չէ, ժողովուրդը պատրաստ է իր իրավունքների համար պայքարել, ուղակի առիթ է պետք», – ասաց Արշավիր Խալափյանը եւ հավելեց, որ հիմնականում կոռուպցիոն դրսեւորումներ նկատելի են բնապահպանության եւ քաղաքաշինության ոլորտներում: «Բնապահպանական ոլորտում պատասխանատու պետական կազմակերպությունների կողմից մասսայական անտարբերություն է տիրում, դրա մասին է վկայում  նաեւ հենց   օրեր առաջ Ողջի գետի ջրերի գունափոխման  հանգամանքը: Պատասխանատուները պարզապես անգործության են մատնված, այդ անգործությունը կարելի  է  որակել որպես կոռուպցիոն դրսեւորում:  Քաղաքաշինության ոլորտում եւս տեսնում ենք կոռուպցիոն դրսեւորումներ`  քաղաքի ճարտարապետական տեսքի, շինարարության արդյունքում առաջացող բնապահպանական խնդիրների մասին է խոսքը,  եթե կոնկրետ բողոքող չի լինում, ապա պատկան մարմինները, ըստ էության, մնացած հարցերի վրա չեն խորանում», – ավելացրեց տարածաշրջանային փորձագետը:

«Կոռուպցիայի դեմ պայքարի բազմակողմանի խթանում» ծրագրի շրջանակներում տեղական եւ միջազգային փորձագետների մասնակցությամբ կազմակերպվելու են ուսուցումներ, իսկ 2015թ-ի սկզբից էլ մոտ 2-3 հազար եվրո արժողությամբ փոքր դրամաշնորհներ կտրամադրվեն ՔԿՀ-ներին եւ ԶԼՄ-ներին: Ծրագրի ընդհանուր բյուջեն կազմում է 650 հազար եվրո:

 

Մերի ՍՈՂՈՄՈՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մարտ 2014
Երկ Երե Չոր Հնգ Ուրբ Շաբ Կիր
« Փետ   Ապր »
 12
3456789
10111213141516
17181920212223
24252627282930
31