Վարդանաշենի գյուղապետ Արթուր Մանուկյանը զարմացել է իր հասցեին ուղղված համագյուղացի ազատամարտիկ Գեւորգ Սարգսյանի մեղադրանքներից, թե իբր ինքը Սարգսյանին հորդորել է չմասնակցել ի պաշտպանություն Վոլոդյա Ավետիսյանի կազմակերպվող հավաքներին, ցույցերին:
«Ով գա, կարող եմ պատասխանել, իրենց բերեք իմ դեմ ու աչքերիս մեջ նայեն, ասեն՝ սպառնացել եմ իրենց: Ես ինչ գործ ունեմ իրենց ասեմ՝ մասնակցեն, թե չմասնակցեն: Ես Վոլոդյա Ավետիսյանին չեմ էլ ճանաչում: Եթե իրենք էլ են ազատամարտիկ, չի կարելի համայնքի ղեկավարին շանտաժի ենթարկել: Սուտ են ասում»,- մեզ հետ զրույցում ասաց գյուղապետը:
Մեր հարցին, ինչու են ստում ու գյուղապետին նման մեղադրանքներ ներկայացնում, պարոն Մանուկյանն ասաց. «Ինձ չեն ընտրել, չեն ուզում գյուղապետ լինեմ, երեւի դրա համար»:
Պարոն Մանուկյանից նաեւ հետաքրքրվեցինք, տեղյա՞կ է արդյոք իր մեկ այլ ազատամարտիկ համագյուղացի Ստեփան Ստեփանյանին ինչո՞ւ եւ ովքե՞ր են հետապնդում: Հիշեցնենք՝ հետապնդումների մասին նախօրեին ասուլիսի ժամանակ հայտարարեց Ստեփան Ստեփանյանը:
Կարդացեք նաև
«Ես իրավունք ունեմ հերքելու, սուտ տեղեկատվություն է: Չգիտեմ՝ ինչ է նրանց ուզածը, եթե իմանամ, միգուցե իրենց ես էլ կարողանամ օգնել»:
Հիշեցնենք, որ երեկ ասուլիսի ժամանակ ազատամարտիկները պնդում էին, որ ԱԱԾ աշխատակիցներն էլ են իրենց հետապնդում, այցելում իրենց բնակարաններ, ազգականների տներ հարց ու փորձ անում: ԱԱԾ-ի լրատվական ծառայությունից մեզ հետ զրույցում հերքեցին այդ տեղեկությունները:
Արփինե ՍԻՄՈՆՅԱՆ
