Դեղագործության ոլորտի հիմնական խնդիրները կկարգավորվեն «Դեղերի մասին» նոր օրենքի ընդունմամբ: Այս մասին հայտնեց առողջապահության նախարար Դերենիկ Դումանյանը դեղագործության ոլորտի ներկայացուցիչների հետ՝ 5-րդ «Առանց փողկապների» հանդիպման ժամանակ, որը տեղի ունեցավ շաբաթ օրը՝ Աղվերանում: Մոտակա շաբաթների ընթացքում կառավարությունը կհաստատի եւ օրենքը կներկայացնի ԱԺ քննարկմանը:
Հանդիպման սկզբում դեղագործական ոլորտում որպես դրական կողմ հայտարարվեց «Լիկվոր» ընկերության ձեռքբերումը: «Լիկվոր»-ն անցյալ տարի ստացավ դեղերի պատշաճ արտադրության լիցենզիա` GMP, ինչը նշանակում է, որ այս ընկերությունը դեղ է արտադրում Եվրամիության չափանիշներին համապատասխան:
«Մեր տեղական արտադրությունը ավելի արդյունավետ լինելու համար, մնացած դեղարտադրող ընկերություններին եւս հատկացրել ենք ժամանակ՝ համապատասխան վկայական ունենալու համար, հակառակ դեպքում կդադարեցվի այդ ընկերությունների գործունեությունը»,- Aravot.am-ի հետ զրույցում ասաց ՀՀ առողջապահության նախարար Դերենիկ Դումանյանը:
Դեղագործության ոլորտի ներկայացուցիչները Դերենիկ Դումանյանի հետ քննարկեցին դեղարտադրության ոլորտի օրենսդրական բարեփոխումների, «Դեղերի մասին» նոր օրենքի, ինչպես նաեւ դեղերի գրանցման, ներմուծման եւ արտահանման, դեղատների վարկանիշի եւ ավելացված արժեքի հարկին վերաբերող հարցեր:
Կարդացեք նաև
Ըստ նախարարի, նոր օրենքի նախագծում պետք է սահմանել գների կարգավորման նորմեր. ամենայն հավանականությամբ կվերահսկվի ոչ միայն գների վերին, այլ նաեւ ներքին շեմը: Նախարարի խոսքերով՝ գնային վերահսկողության շնորհիվ հնարավոր կլինի նվազեցնել դեղերի գները: Իսկ դեղագործության ոլորտի մասնագետներից մի մասն առաջարկում է, որ գների կարգավորում պետք է դնել միայն հիմնական դեղերի ցանկի նկատմամբ, իսկ մի մասը կարծում է, որ հիմնական դեղերից ընդհանրապես հանվի ավելացված արժեքի հարկը, որոշ մասնագետներ էլ գտնում են, որ մարժայի վրա սահմանափակումներ դնելով պետք է կարգավորել գները, իսկ նախարարն առաջարկեց. «Որպեսզի այս փուլում չդնենք այս խնդիրը՝ մենք կսահմանենք նման նորմեր, բայց կարգը կսահմանի կառավարությունը»:
Պարոն Դումանյանը քննարկելով դեղատների վարկանիշային տարբերակումը, նշեց, որ նման դեղատների առավելությունը կլինի այն, որ բարձր վարկանիշով դեղատունը սովորական դեղատնից կտարբերվի վերահսկման չափանիշներին համապատասխանելով, այսինքն` չեն լինի ժամկետանց, չգրանցված դեղեր, կանոնակարգված կլինեն դեղերի գները, իսկ աշխատողները այնպիսի մասնագետներ, որոնք կարող են պատշաճ խորհրդատվություն մատուցել հիվանդներին:
Ըստ նախարարի՝ այսօր ազգաբնակչությանը հիմնականում հետաքրքրող խնդիրը վերաբերում է դեղերի որակին եւ մատչելիությանը: «Որակի վերահսկողությունը միայն տեղական գործակալությունը կամ փորձաքննությունը չի, դա նաեւ վերահսկողությունն է ցանցում, բոլոր պահպանման տարածքներում եւ մինչեւ սպառողին հասնելը»,-ասաց նախարարը:
Անուշ ՄԱԹԵՎՈՍՅԱՆ
