«Սահմանադրական դատարանը օրենքը, առկա ձեւակերպմամբ, ճանաչեց Սահմանադրությանը հակասող: Միեւնույն ժամանակ նշեց, որ օրենքի ուժը կորցնելու վերջնաժամկետը սեպտեմբերի 30-ն է: Քանի որ օրենքը փոխկապակցված է շուրջ 50 այլ օրենքների հետ, սա արվեց, որպեսզի իրավական վակուում չառաջանա եւ քանի որ ՍԴ-ն պահումները համարեց սեփականության իրավունքը խաթարող, ապա հստակորեն պետք է ասենք, որ Սահմանադրության գերակայությամբ որեւէ պահում չպետք է արվի»,- Aravot.am-ի հետ զրույցում անդրադառնալով ՍԴ որոշմանն ու վարչապետի հայտարարությանը` ասաց «Դեմ եմ» շարժման անդամ Դավիթ Խաժակյանը` նշելով, որ պետք է վերադարձվեն վճարված գումարները, քանի որ այդ պահումների իրավական հիմքը արդեն իսկ ճանաչվել է Սահմանադրությանը հակասող եւ անվավեր:
Դավիթ Խաժակյանի ձեւակերպմամբ` վարչապետը եւս մեկ անգամ երկխոսության կոչ արեց օրենքով մտահոգ քաղաքացիներին, միեւնույն ժամանակ նշելով, որ օրենքը ուժի մեջ է: «Այո օրենքը ուժի մեջ է (ձեւական, իրավական առումով), բայց պահումներ չպետք է արվեն: Ես կողմնակից եմ, որպեսզի նոր օրենքը ձեւավորվի քաղաքացիների եւ նախաձեռնության ակտիվ ներգրավվածությամբ, բայց եթե պահումներ կատարելու վտանգը իրական լինի, այդ իրադրությունը կբացառի երկխոսության հնարավորությունը»,- ավելացրեց Դավիթ Խաժակյանը, ըստ որի`դրանից ելնելով իրենք ակնկալում են կառավարության դիրքորոշումը` պահումների եւ վճարված գումարների վերադարձելիության վերաբերյալ:
Եվա ՀԱԿՈԲՅԱՆ
