ՀՀ էկոնոմիկայի նախարար Վահրամ Ավանեսյանը եւ «Էյ Ջեյ Էյ Ազատ տնտեսական գոտի» ՓԲԸ-ի գլխավոր տնօրեն Արտակ Ուդումյանն այսօր պայմանագիր կնքեցին՝ Երեւանում, Կաշեգործների փողոցի վրա գտնվող գույքային համալիրի տարածքում ստեղծված ազատ տնտեսական գոտու կազմակերպման մասին:
Ազատ տնտեսական գոտում իրականացվելու են աշխատանքներ ոսկերչության, ակնագործության եւ ժամագործության ոլորտում:
Նախարարի խոսքերով ազատ տնտեսական գոտում աշխատելու են շուրջ 120 ընկերություններ եւ ստեղծվելու են շուրջ 1500 նոր աշխատատեղեր:
Վահրամ Ավանեսյանը լրագրողներին տեղեկացրեց, որ «Էյ Ջեյ Էյ» ընկերությունը 10.72 մլն դոլար է ներդնելու ազատ տնտեսական գոտում. «Որպեսզի ստեղծվեն համապատասխան ենթակառուցվածքներ եւ ապահովվի ընկերությունների արդյունավետ աշխատանքը»: Վահրամ Ավանեսյանը հույս հայտնեց, որ նոր ազատ տնտեսական գոտին կսկսի գործել 2015 թվականից:
Կարդացեք նաև
Ընկերության տնօրեն Արտակ Ուդումյանն ասաց, որ այս տնտեսական գոտին նոր բնագավառ է, չնայած նրան, որ արդեն մի ազատ տնտեսական գոտի գործում է Հայաստանում: «Միեւնույն է, ոսկերչությունը իր յուրահատկություններն ունի եւ մենք, ստեղծելով նման կառույց, կհանդիպենք այն հարցերին, որ լուծման կարիք ունեն: Մեր նպատակն է ստեղծել Հայաստանում հզոր ոսկերչական կենտրոն եւ կարողանալ կենտրոնը հասցնել համաշխարհային մակարդակի»:
Էլյա ՀՈՎՀԱՆՆԻՍՅԱՆ