Aravot.am-ի հետ զրույցում քաղաքագետ Գագիկ Համբարյանը կարծիք հայտնեց, որ վարչապետ ընտրեցին մի այնպիսի անձի, որը համոզելու բավականին մեծ պրոֆեսիոնալիզմ ունի: «Դա նորություն չէ, միշտ էլ իշխանությունները դիմել են Հովիկ Աբրահամյանի այդ շնորհքին, որպեսզի բանակցությունների մեջ մտնեն ԲՀԿ-ի հետ, երբ որ պետք է եղել, բաց դա նորմալ իրավիճակում: Հիմա այլ իրավիճակ է»,-ասում է քաղաքագետը: Ըստ նրա, ԲՀԿ-ն ունի 3 տարբերակ ունի այս իրավիճակում, առաջինը` հրաժարվում է մտնել կոալիցիա և շարունակում է իր կիսաընդդիմադիր քաղաքականությունը`որպես երրորդ ուժ: Երկրորդ տարբերակն այն է, որ կրկնելով «Օրինաց երկրի» քայլը, որը արեց Արթուր Բաղդասարյանը 2008 թվականի նախագահական ընտրությունների հետո, նախարարական աթոռներ ստանալու համար դառնում է կոալիացիայի անդամ` բնականաբար այս ճանապարհով ինքնավարկաբեկվելով: Եվ երրորդ, որը քաղաքագետը ամենահավանականն է համարում, Գագիկ Ծառուկյանը համաձայնության է գալիս ՀՀԿ-ի հետ` իր կարևոր ծրագրային դրույթները իրագործելու, մասնավորապես մանր ու միջին բիզնեսը փրկելու հետ կապված:
«Ես կարծում եմ, որ իշխանությունները չասացին ԱԺ նախագահի անունը, որպեսզի այս հանգամանքը ևս լուծեն բանակցությունների միջոցով, հնարավոր է Հանրապետական կուսակցությունը հրաժարվի ԱԺ նախագահի պաշտոնից, որովհետև այս պաշտոնը էնքան էլ կարևոր չէ ԱԺ-ում մեծամասնություն կազմող հանրապետականների պարագայում»: Ըստ մեր զրուցակցի, թեև Հովիկ Աբրահամյանին երկու շաբաթ ժամանակ է տրված ԲՀԿ-ին ու ՀՅԴ-ին համոզելու համար, սակայն ՀՀԿ-ական պարագլուխները, երբեմն, գործը փչացնում են. նրանք տառապում են նարցիսիզմ կոչվող հիվանդությամբ, մտածում են, քանի որ իրենք են հաղթանակ տարել ԱԺ ընտրություններում, ուրեմն կառավարության ձևավորման մենաշնորհը իրենցն է:
«Մեր երկիրը այս պահին այնպիսի վատ սոցիալ-տնտեսական վիճակում է, որ մեզ մոտ պետք չէ տարբեր քաղաքական ուժերի միջև գզվռտոց ու աթոռակռիվ, այլ ընդհակառակը մերոնք պետք է միավորվեն և ձևավորեն պետականությունը փրկող կառավարություն: Մենք արդեն հասել ենք այդ եզրագծին: Մարդիկ թողնում, լքում են հայրենիքը, նրանք հուսախաբվել են, որ այստեղ ինչ-որ բան կարելի է փոխել»,- մտահոգվում է քաղաքագետը:
Նունե ԱՐԵՎՇԱՏՅԱՆ
Ժողովրդի համար միեւնույնն է մեծ հաշվով, բայց գոնե մի կիսաինտիլիգենտ անձ դնեին: Դուրսն ինչ կասեն? Մարդու աչքերին նայողը պիտի մտածի որ այդ երկրում անասնագողեր (конокрад) են ապրում: