ՕԵԿ-ի` կոալիցիայից դուրս գալու քայլը շատերին զարմացրեց, շատերին այն շոու է հիշեցնում, մյուսները համարում են, որ ՕԵԿ-ը լքեց «խորտակվող նավը» և որ ՕԵԿ-ի`կոալիցիան լքելու նախաձեռնությունից հետո Սերժ Սարգսյանը ծանր իրավիճակում է հայտնվել: Ավելին, ՕԵԿ-ը ոչ միայն դուրս եկավ կոալիցիայից, այլև սկսեց դեմ խոսել իշխանությանը` այնպիսի նախաձեռնություններին, որոնց այս քաղաքական ուժը երբեք դեմ չէր եղել:
Մասնավորապես երեկ ՕԵԿ քաղխորհրդի նիստից հետո ՕԵԿ խմբակցության ղեկավար Հեղինե Բիշարյանն ասաց, թե կուտակայինի հետ կապված բարեփոխումը լուրջ մարտահրավեր է` շեշտելով, որ կաջակցեն «Դեմ եմ»-ի երիտասարդներին. «Կաջակցենք, մի մտածեք: Մենք ունենք մեր տեսլականը կուտակայինի վերաբերյալ»:
Aravot.am-ը հրապարակախոս Կարինե Հակոբյանից հետաքրքրվեց` ո՞րն էր ՕԵԿ-ի շարժառիթը` լքել կոալիցիան, տիկին Հակոբյանը պատասխանեց. «Անկախ դրդապատճառներից ու շարժառիթներից, ներքին խոհանոցից, այդ քայլը ՀՀ քաղաքական դաշտի համար ողջունելի է, քանի որ ինքնաբերաբար ուժեղանում է ընդդիմությունը: Նրանք ստիպված են միանալ «Դեմ եմ» շարժմանը, եթե իշխանության մեջ չես, դու ուրիշ անելիք չունես, քան միանալ այդ թևին: Այլապես դու ընդհանրապես դուրս ես գալիս քաղաքական ասպարեզից»:
Մեր հարցին` ինչպե՞ս կարող են, օրինակ, ՕԵԿ-ը, ՀՅԴ-ն, «Ժառանգությունն» ու ԲՀԿ-ն, որոնք գաղափարական սկզբունքային տարբերություններ ունեն, աշխատել միևնույն դաշտում, տիկին Հակոբյանն այսպես արձագանքեց. «Այսօր թիվ մեկ խնդիրը ընդդիմության ուժեղացնելն է: Ընդդիմությունը պիտի ֆինանսավորվի պետական բյուջեից, այնպես, որ կախված չլինի անձերից ու բիզնեսից»:
Կարդացեք նաև
Համեմատության համար տիկին Հակոբյանը նշեց, թե Մեծ Բրիտանիայում ընդդիմության ղեկավարի աշխատավարձը վարչապետի աշխատավարձին է հավասար: Ու նկատեց, թե դա միայն աշխատավարձի խնդիր չէ, այլ կարևորության հարց:
Տաթև ՀԱՐՈՒԹՅՈՒՆՅԱՆ
Երբ տաշտում, ի նկատի ունեմ պետբյուջեն, կեր է լինում, ՕԵԿ-ը կոալիցիայի մաս է կազմում, երբ տաշտից օգտվելու շանսերն ու չափը նվազում է, նրանք քննադատողն են դառնում իրենց տեսակի: Տիպիկ արջի վարքագիծ՝ ճարպ են հավաքում, հետո թաթները ծծում: