Նոյեմբերյանի զորամասում 2013թ. մայիսի 15-ին Լյուքս Ստեփանյանի սպանության գործով դատավարության ապրիլի 17-ի նիստում դատավոր Զոյա Զաքինյանը հրապարակեց ժամկետային զինծառայողներ Արշակ Պետրոսյանի, Միշա Ջանազյանի, Հրաչյա Մարգարյանի հետ ամբաստանյալ Դավիթ Խաչատրյանի առերես հարցաքննության արձանագրությունները: Ամբաստանյալի պաշտպան Վաղինակ Գեւորգյանի միջնորդությամբ դատարանը հրապարակեց նախաքննության ավարտի մասին Դավիթ Խաչատրյանին հայտնելու ,Դ. Խաչատրյանի՝ որպես մեղադրյալի, հարցաքննության արձանագրությունները, քրեական գործերի նյութերին ծանոթանալու մասին Դ. Խաչատրյանի հայտարարությունը: Դրանցում Խաչատրյանը հայտարարել է, որ չի ցանկանում ծանոթանալ քրեական գործի նյութերին, քանզի իր կատարած արարքը ՀՀ քրեական օրենսգրքի 104 հոդվածի 2-րդ մասի 6-րդ կետով որակելու փաստը հաստատում է, որ իր նկատմամբ կատարվել է ոչ օբյեկտիվ, մեղադրական թեքումով նախաքննություն:
Ամբաստանյալի մյուս պաշտպան Երեմ Սարգսյանն անդրադարձավ կատարված դատաձգաբանական, դատաբժշկական համալիր փորձաքննության եզրակացության մեջ տեղ գտած հակասություններին: Նրա խոսքերով ՝ նույն կրակոցից տուժած Հրաչյա Սարգսյանի, Լյուքս Ստեփանյանի զինվորական գլխարկների եւ նրանց ստացած վնասվածքների վերաբերյալ եզրակացության մեջ նշվել է գնդակի տարբեր, իրար հակադիր ուղղություններ: Նշված եզրակացությունը կազմվել է նաեւ վկաներ Արշակ Պետրոսյանի եւ Հրաչյա Մարգարյանի լրացուցիչ հարցաքննությունների արձանագրությունների հիման վրա: Ե. Սարգսյանի խոսքերով՝ եզրակացությունում նշված է ՝ Լյուքս Ստեփանյանի հայացքն ուղղված է եղել դեպի պատը, մինչդեռ նույն վկաները ցուցմունք են տվել, որ կրակոցից առաջ Լյուքսի հայացքն ուղղված է եղել Դավիթ Խաչատրյանի կողմը: Դատաքննության ընթացքում նույն վկաները եւ Դավիթ Խաչատրյանը ցուցմունք են տվել, որ կրակոցի պահին Լյուքս Ստեփանյանը նայել է Դավիթ խաչատրյանի ուղղությամբ:
Պաշտպանը միջնորդեց՝ դեպքի հանգամանքների լրիվ, օբյեկտիվ, բազմակողմանի հետազոտման եւ ամբաստանյալին մեղսագրված արարքի ճիշտ գնահատման եւ փորձաքննության վերաբերյալ պարզաբանումների համար դատարան կանչել փորձագետներ Ա. Համբարձումյանին, Լ. Թովմասյանին եւ Ա. Ղազարյանին: Պաշտպան Վաղինակ Գեւորգյանը միացավ միջնորդությանը: Մեղադրող Արթուր Զաքարյանն այդ միջնորդությունն անհիմն համարեց: Նրա խոսքերով՝ պաշտպանական կողմը սեւեռվել է որոշակի հանգամանքների վրա, որոնք որեւէ հիմք չեն տալիս փորձագետների եզրակացությունը կասկածի տակ առնելու եւ նրանց դատարան կանչելու համար: Տուժողի իրավահաջորդի ներկայացուցիչ Արմեն Սարգսյանը նույնպես դեմ էր այդ միջնորդությանը: Երեմ Սարգսյանը հայտարարեց, որ մեղադրողը չի կարող իրեն փորձագետի գործառույթներ վերապահել: Դատարանը բավարարեց պաշտպանի միջնորդությունը: Դատական նիստի ավարտին տեղի տվեցին Լյուքս Ստեփանյանի մոր՝ Լուիզա Ստեփանյանի նյարդերը, նա խիստ կշտամբեց ամբաստանյալի պաշտպաններին: Այդ ժամանակ դատավորը դատավարության կողմերի հետ քննարկում էր հաջորդ նիստի օրը : «Մայիսի 15-ին նշանակեք,այդ օրը նշանակեք»՝ բարձր ձայնով ասաց Լուիզա Ստեփանյանը: Դատական հաջորդ նիստը նշանակվեց ապրիլի 25-ին, ժամը 14-ին:
Կարդացեք նաև
Մանրամասները` տեսանյութում:
Ոսկան ՍԱՐԳՍՅԱՆ
