Հայաստանի 1999 թվականին ծնված բասկետբոլիստուհիները մեկնում են Կազան` ապրիլի 20-27-ը առաջին անգամ մասնակցելու ԱՊՀ երկրների դպրոցականների 2-րդ միջազգային փառատոնին:
Փառատոնի ծրագրում ընդգրկված է 5 մարզաձեւ` բասկետբոլ,վոլեյբոլ, թենիս, սեղանի թենիս, շախմատ եւ բադմինթոն: Հայաստանը հանդես է գալու չորսում, բացի վոլեյբոլից:
Հայաստանի բասկետբոլի ֆեդերացիայի փոխնախագահ Վահագն Հարությունյանը զրուցեց Aravot.am-ի հետ:
– Քանի՞ երկիր է հայտավորվել:
Կարդացեք նաև
– Կոնկրետ բասկետբոլին հատկացված է 12 երկրի մասնակցություն: Մեր տեղեկություններով այս պահի դրությամբ մասնակցությունը հաստատել է ինը երկիր: Բայց հույս ունենք, որ մինչեւ փառատոնի բացումը թիվը կհամալրվի:
– Մեր թիմը մեկնում է միայն մասնակցելո՞ւ համար, թե՞ կոնկրետ նպատակներով:
– Մենք մրցանակային տեղ գրավելու խնդիր ենք դրել մեր առջեւ, ինչը իրագործելի է: Բայց շատ բան կախված կլինի նրանից, թե վիճակահանությամբ ինչ մրցակիցներ կունենանք խմբում:
– Վստա՞հ եք, որ կարող ենք պայքարել մրցանակային տեղի համար:
– Միանգամայն: Բավականին լավ թիմ ունենք, որն իր կարողությունները արդեն ցույց է տվել: Մասնավորապես, մեր աղջնակները Երեւանում անցկացված Ջեմմա Իսրայելյանի միջազգային հուշամրցաշարում 20 միավորի առավելությամբ հաղթել են Ղազախստանի` իրենցից տարիքով մեծ աղջիկներով համալրված թիմին, Վրաստանում մարտ ամսին անցկացված համատեղ ուսումնամարզական հավաքի ընթացքում 30 միավորի տարբերությամբ հաղթել են այդ երկրի իրենց հասակակիցներին: Մեր թիմում խաղում են իրենց տարիքի համար բավականին բարձրահասակ աղջիկներ, որոնք արդեն բավարար մրցափորձ ունեն: Թիմը համալրված է հիմնականում Երեւանի բասկետբոլիստուհիներով, մեկ հոգի էլ ներկայացնում է Արարատ քաղաքը:
– Կոնկրետ փառատոնին նախապատրաստվե՞լ եք:
– Անշուշտ: Հայաստանի բասկետբոլի ֆեդերացիայի նախագահ Հրաչյա Ռոստոմյանը անձամբ եւ նրա միջնորդությամբ` ՀԱՕԿ-ը, կազմակերպել են ուսումնամարզական հավաքներ, ընկերական հանդիպումներ, որոնցից Վրաստանի մասին արդեն ասացի: Ի դեպ, մրցավայր էլ մեկնում ենք ՀԲՖ եւ ՀԱՕԿ-ի աջակցությամբ ու մնալու ենք Համաշխարհային ուսանողական խաղերի առիթով կառուցված ավանում:
Աշոտ ՀԱԿՈԲՅԱՆ
Լուսանկարը` ՀԲՖ կայքէջի
