Ժնևի բանակցությունների ժամանակ Ռուսաստանը չի խոստովանել Ուկրաինայի արևելյան շրջանների իր ռազմական ներկայության մասին, հայտնել է Ուկրաինայի արտաքին գործերի նախարարի պաշտոնակատար Անդրեյ Դեշչիցան: Փոխանցում է «Կորեսպոնդենտ» լրատվականը:
«Մենք քննարկում էինք այդ հարցը, մենք պայքարում էինք, մենք ունեինք բոլոր ապացույցները: Սակայն այդ ապացույցները պարոն Լավրովին ներկայացնելու անհրաժեշտություն չկար, քանի որ հենց սկզբից ռուսական կողմը հերքում էր դա», – ասել է նա ապրիլի 18-ին՝ պատասխանելով հարցին, թե արդյոք քննարկվել է Ուկրաինայի արևելքում ռուսական զորքերի ներկայության հարցը:
Դեշչիցան հիշեցրել է, որ ռուսական կողմը նույնպես հերքում էր Ղրիմում իր զորքի ներկայության մասին տեղեկությունները, սակայն ապրիլի 17-ին ՌԴ նախագահ Վլադիմիր Պուտինը հաստատել է դա:
Կարդացեք նաև
Ժնևի հանդիպումը, որին մասնակցել է Եվրամիությունը, Ռուսաստանը, ԱՄՆ-ը և Ուկրաինան տեղի ունեցել ապրիլի 17-ին: Բանակցությունների արդյունքում ձեռք է բերվել համատեղ հայտարարություն, որը Ուկրաինայի հարավ-արևելյան շրջանների զինյալներին հորդորում է հանձնել զենքերը:
Այդուհանդերձ, Դեշչիցան հայտնել է, որ իրենք մտադիր չեն դադարեցնել զինված խմբավորումների դեմ հատուկ գործողությունները և դրա շարունակականությունը կախված է Ժնևի հայտարարության գործնական իրականացումից:
Պատրաստեց Հովհաննես ԻՇԽԱՆՅԱՆԸ
