Ոստիկանության քննչական բաժնի 2-րդ բաժանմունքի քննիչ, ոստիկանության ավագ լեյտենանտ Տ.Մուրադյանը որոշում է կայացրել Տիգրան Համբարձումյանին առաջադրված մեղադրանքը փոխելու եւ այն լրացնելու մասին:
Անցյալ տարվա հուլիսի 1-ին Տիգրան Համբարձումյանին մեղադրանք էր առաջադրվել այն բանի համար, որ ընտանեկան խնդիրների հետ կապված, վիճաբանության ժամանակ հունիսի 28-ին դանակով վնասվածքներ էր հասցրել կնոջը՝ Տ.Ն-ին:
Տիգրան Համբարձումյանի պաշտպանությունն իրականացնում էր ՀՀ փաստաբանների պալատի անդամ Լիանա Բալյանը (լուսանկարում), իսկ կնոջ՝ Տ.Ն-ի ներկայացուցիչն էր ՀՀ փաստաբանների պալատի անդամ Սեդա Սաֆարյանը:
Մենք նախաքննության փուլում լսել ենք երկու կողմերի փաստաբաններին՝ կապված այս վեճի հետ:
Կարդացեք նաև
Կալանավորված Տիգրան Համբարձումյանի նկատմամբ նշանակվել էր մի քանի անգամ դատահոգեբուժական փորձաքննություն: Պարզվել էր, որ նա գտնվել է «կոմուլատիվ աֆեկտի վիճակում»:
Կրկնակի դատահոգեբուժական փորձաքննությամբ էլ արձանագրվել էր, որ Տ.Համբարձումյանը կնոջ վարքագծի հետեւանքով առաջ եկած երկարատեւ հոգեվիճակի հետեւանքով հանկարծակի առաջացած հոգեկան խիստ հուզմունքի վիճակում է կատարել արարքը, որը ոչ թե քրեական օրենսգրքի 34-104 հոդվածի 1-ին մասի հատկանիշներին է համապատասխան, այլ քրեական օրենսգրքի 126 հոդվածի 1-ին մասի հատկանիշներին:
Ըստ պաշտպան Լ.Բալյանի, փոխվեց մեղադրանքը և հիմնավորվեց, որ տուժող` Տ. Ն-ի պարբերաբար դրսևորած վարքագծի կապակցությամբ առաջ եկած երկարատեւ հոգեճնշող իրավիճակի հետևանքով հանկարծակի առաջացած հոգեկան խիստ հուզմունքի վիճակում է Տ. Համբարձումյանը գտնվել կումուլատիվ աֆեկտի վիճակում եւ կատարել հանցագործություն:
Լիանա Բալյանի տեղեկացմամբ , այդ մասին բարձրաձայնել են լրատվամիջոցները, սակայն «նախկին դատախազի օրոք մեր փաստարկները հաշվի չեն առնվել: Իսկ նոր դատախազ Սասուն Խաչատրյանի նշանակումով հաստատվեց, որ իմ պաշտպանյալը գտնվել է խիստ հուզմունքի տակ և ապացուցվեց տուժողի վարքը: Հարց է ծագում, ո՞վ պետք է պատասխան տա Տ.Համբարձումյանին 10 ամիս ապօրինի կալանքի տակ պահելու համար, որով նա քննիչ Տ. Մուրադյանի և դատախազ ` Ս. Հովսեփյանի գործողությունների պատճառով կրեց մեծ վնասներ»:
ՀՀ Քրեական օրենսգրքի 34-104 հոդվածը վերաորակվել է 34-105 հոդվածով, կիրառվել է 2013թ. հոկտեմբերի 3-ի համաներումը և գործը կարճվել է:
Տիգրան Համբարձումյանը գտնվում է ազատության մեջ:
Ռուզան ՄԻՆԱՍՅԱՆ
