«Կներեք, Մարտի 1-ի քաղաքական միակ դերակատարը Ռոբերտ Քոչարյանը չէր»,- Aravot.am-ի հետ զրույցում այսպիսի հայտարարություն արեց Հայաստանի Քրիստոնեա-դեմոկրատական կուսակցության նախագահ, ՀՀԿ խմբակցության պատգամավոր Խոսրով Հարությունյանը: Aravot.am-ի հետ զրույցում երկրորդ նախագահ Ռոբերտ Քոչարյանի վերադարձի հետ կապված պարոն Հարությունյանը վստահեցրել էր, որ նա միշտ էլ քաղաքականության մեջ է եղել, երբեք չի գնացել, որ հիմա էլ հետ վերադառնա: Ըստ Խոսրով Հարությունյանի, Ռոբերտ Քոչարյանը պատրաստվում է մասնակցել առաջիկա նախագահական ընտրություններին:
Ուստի մենք հետաքրքրվեցինք՝ նրա ժամանակ եղավ Մարտի 1 եւ Հոկտեմբերի 27, Ձեր կարծիքով ժողովուրդն այդ երկու ցավալի միջադեպերը կարո՞ղ է ներել նրան, մոռանալ՝ նրան նորից ընդունելու համար: Խոսրով Հարությունյանը պատասխանեց. «Թույլ տվեք չմեկնաբանել: Ես չեմ կարծում, որ նույնիսկ այս առիթով, այդ կարեւոր, մեզ համար շատ ողբերգական իրադարձությունները պետք է քննարկումների առարկա դառնան: Ես այդ կարծիքին չեմ: Դրանք առանձին ֆրագմենտներ են՝ շատ պատասխանատու, շատ ցավալի, բայց ֆրագմենտներ, որոնք պետք է առանձին վերլուծել: Ես այդ կարծիքին եմ: Չի կարելի Ռոբերտ Քոչարյանի գործունեությունը հանգեցնել բուն Մարտի 1-ին: Նրա գործունեության ժամանակ դրականն էլ է եղել, բացասականն էլ է եղել»:
Մեր զարմանքին, որ այդ ժամանակ գլխավոր գերագույն հրամանատարը երկրի նա է եղել եւ անմիջական պատասխանատուն նա է՝ Խոսրով Հարությունյանը առարկեց. «Կներեք, դրա քաղաքական միակ դերակատարը Ռոբերտ Քոչարյանը չէր: Մարտիմեկյան իրադարձություններն ունեին լիդեր, ունեին պատասխանատու: Մենք այդ հարցերը դեռեւս չենք քննարկել, հանրությունը դեռեւս այս ամենի օբյեկտիվ գնահատականներն ու պատասխանները չի տվել: Դրա համար ես վաղաժամ կհամարեմ որեւէ նման մեկնաբանություն»:
Կարդացեք նաև
Հռիփսիմե ՋԵԲԵՋՅԱՆ
