Լրահոս
Օրվա լրահոսը

Միգրացիա. Ժամանակակից հասարակություն հիմնախնդիր

Ապրիլ 29,2014 16:56

2013 թ-ի վիճակագրական տվյալների համաձայն՝ ամբողջ աշխարհում գրանցված է ավելի քան 230 միլիոն միգրանտ:

Այսօր ԵՊՀ գիտական խորհրդի նիստերի դահլիճում մեկնարկեց «Միգրացիան գլոբալացված աշխարհում» թեմայով երկօրյա միջազգային գիտաժողովը: ԵՊՀ սոցիոլոգիայի ֆակուլտետի նախաձեռնությամբ կազմակերպված գիտաժողովն իրականացվում է «Tempus» ծրագրի շրջանակներում:

Միջազգային գիտաժողովին, բացի Երևանի պետական համալսարանից, մասնակցում էին նաև արտասահմանյան մի շարք բուհերի, հետազոտական կառույցների, միջազգային, պետական ու հասարակական կազմակերպությունների ներկայացուցիչներ: Մասնավորապես զեկուցողներ կային Գերմանիայից, Ռուսաստանից, Բելառուսից, Իտալիայից, Լեհաստանից, Իսպանիայից ու Վրաստանից:

Մասնակիցներին ողջունեց ԵՊՀ սոցիոլոգիայի ֆակուլտետի դեկան Արթուր Մկրտիչյանը, ով ընդգծեց, որ ժամանակակից աշխարհի համար այսօր միգրացիան կարևորագույն և միաժամանակ վտանգավոր խնդիրներից մեկն է: «Այս գիտաժողովը շատ կարևոր է մեզ համար, քանի որ Հայաստանում միգրացիան բավականին արագ տեմպերով զարգացող երևույթ է: Ներկայումս գլոբալիզացիայի դարաշրջանում կատարվող զարգացումներում միգրացիան լուրջ դեր է խաղում, և մենք՝ սոցիոլոգներս, ուղղակի պարտավոր ենք բացատրել այդ երևույթը և ուսումնասիրել դրա պատճառներն ու հետևանքները»,- ասաց Արթուր Մկրտիչյանը:

Ողջույնի խոսք ասաց նաև ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը. «Միգրացիայի հետ կապված խնդիրներն այսօր ծառացել են ամբողջ աշխարհի առջև, ուստի նմանաբնույթ միջոցառումները բավականին արդիական են: Վստահ եմ, որ տարբեր երկրներից ժամանած գիտնականների և հետազոտողների զեկույցները, խնդրի գլոբալ և լոկալ կտրվածքով հետազոտական տվյալները, ինչպես նաև գիտելիքների փոխանակումը կնպաստեն ոլորտի ուսումնասիրության արդյունավետ իրականացման գործընթացին»:
«Tempus» ծրագրի հայաստանյան համակարգող Լանա Կառլովան իր ելույթում նշեց, որ մեծ նշանակություն ունի այն հանգամանքը, որ խնդրի քննարկումն անց է կացվում հենց համալսարանական միջավայրում: «Համալսարանը հենց այն վայրն է, որտեղ համախմբված են տարբեր բնագավառների մարդիկ, ովքեր համագործակցում են պետական, հասարակական ու միջազգային մի շարք կառույցների հետ: Հարկ է նշել նաև, որ այսօրվա գիտաժողովը կազմակերպել են այն մասնագետները, ովքեր անմիջականորեն աշխատում են ուսանողների հետ: Դա կարևոր փաստ է, քանի որ մեր հիմնական նպատակներից մեկն էլ բարձրագույն կրթության ոլորտում միգրացիայի վերաբերյալ հետաքրքրության ու ուսումնասիրությունների գիտական մակարդակի բարձրացումն է»,- հավելեց Լանա Կառլովան:

Այնուհետև գերմանացի պրոֆեսոր Լիդիա Փոթսն իր զեկույցում անդրադարձավ գլոբալ միգրացիայի և դրա խնդիրների լուծմանն ուղղված ժամանակակից գործընթացներին: Ռուսաստանից և Իտալիայից ժամանած սոցիոլոգներն իրենց երկրների օրինակների տեսանկյունից խոսեցին միգրացիայի տարբեր դրսևորումների, սոցիալ-տնտեսական դրդապատճառների, ինչպես նաև սոցիալական տարբեր շերտերի վրա դրա ազդեցության մասին:

Լեհաստանի ներկայացուցիչ Զոֆիա Բալդիգան էլ ներկայացրեց ԵՊՀ-ում տեղակայված «ՀՌԿԿ-Հայաստան» կենտրոնի հետ իրականացրած հետազոտության արդյունքները, որոնք հիմնականում վերաբերում էին աշխատանքային միգրացիային, միգրանտների՝ հայրենիք վերադառնալու հանգամանքի ազդեցությանը հասարակության վրա:

ԵՊՀ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Ապրիլ 2014
Երկ Երե Չոր Հնգ Ուրբ Շաբ Կիր
« Մար   Մայիս »
 123456
78910111213
14151617181920
21222324252627
282930