«Նախարարը երեւի նյութին ուշադիր չի ծանոթացել, facebook-ով է էլի զբաղված եղել, սոցցանցերի նախարարի կոչումը նրան մանկավարժներն են տվել, ոչ թե «Դեմ եմ –ի ակտիվիստները: Եթե մանկավարժները, ոլորտի մարդիկ այդ կոչումը նրան տվել են, ոլորտը լավ գիտեն, ճիշտ կոչում էլ տվել են»,- իրենց երեկվա ակցիային այսօր անդրադարձած ԿԳ նախարար Արմեն Աշոտյանին պատասխանեց «Դեմ եմ» նախաձեռնության անդամ Դավիթ Մանուկյանը:
Նախարարի համեմատել էր, թե «Դեմ եմ» -ի ակտիվիստներն աշխատում են վիրտուալ միջավայրում, ստեղծում են այն եւ գտնվում են դրանում. «Եվ բողոքական այդ շարժումը նախաձեռնել են հենց Facebook-ի հնարավորությունների շնորհիվ: Եթե իրենք օգտագործում են սոցցանցերը, ինչո՞ւ ես էլ չօգտագործեմ»՚: Դավիթ Մանուկյանը սա սխալ համեմատություն համարեց. «Դեմ եմ» -ը Facebook-ը օգտագործում է իր աշխատանքից դուրս, իր աշխատանքի հետ մեկտեղ, իր աշխատանքը պատշաճ կատարելով, որովհետեւ մենք նախարար չենք, եթե պատշաճ չաշխատենք, չենք մնա մեր աշխատանքին, հաջորդ օրը մեզ գործից կհանեն: Մեր քնի հաշվին Facebook-ը օգտագործում ենք հանրային շահի, պահանջի համար: Մի բան է Facebook-ը օգտագործել հանրային շահի համար, մի բան է օգտագործել հանրային պահանջին ընդառաջ չգնալու համար, այն, ինչ արվեց երեկ: Կոնկրետ մանկավարժներ էին եկել, պահանջում էին իրենց լսել, բայց զբաղվածությունը Facebook-ում թույլ չտվեց: Ինչ վերաբերում է, որ իր համար պատվաբեր է սոցցանցերի նախարարի պաշտոնը, ես ուրախ եմ, որ նրան չակերտավոր պատվի են արժանացրել»:
Ակտիվիստի կարծիքով, նախարարը երեկվա իրենց ակցիայի լուրջ պահանջները թողած, այսօր միայն Facebook-ին վերաբերող կատակները մեկնաբանելով՝ ցույց է տալիս, որ ասելիք չունի. «Երբ մարդիկ չունեն լուրջ հարցին պատասխան, շեղելու տեխնոլոգիաներն են օգտագործում՝ բարձրացնելով կիսահումորային հարց, որը հասարակության մի շրջանի մոտ կարող է հետաքրքրություն առաջացնել եւ շեղել հիմնական հարցից, շատ հայտնի տեխնոլոգիա է եւ առանձնապես մեծ գիտելիքներ պետք չեն»:
Կարդացեք նաև
Արփինե ՍԻՄՈՆՅԱՆ
