Լրահոս
Օրվա լրահոսը

Րաֆֆի Հովհաննիսյանը՝ Վլադիմիր Գասպարյանին. «Եթե քմծիծաղ չէ, ներողություն կխնդրեմ»

Ապրիլ 30,2014 22:01

«Ցավում եմ, որ Րաֆֆի Հովհաննիսյանը զղջում է աղոթքի համար ու չեղած բաներ հորինելով կարծես ներում է հայցում՝ հասկանալի չէ ումից»,- ոստիկանապետ Վլադիմիր Գասպարյանը News.am-ի հետ զրույցում այսպես էր պատասխանել Րաֆֆի Հովհաննիսյանի այն հայտարարությանը, որ Ծիծեռնակաբերդում համատեղ աղոթքի ժամանակ Վլադիմիր Գասպարյանը քմծիծաղ է տվել իր թիկունքում: Վլադիմիր Գասպարյանն ասել էր, որ «Քրիստոնյան գիտի՝ աղոթքի համար չեն ապաշխարում, աղոթքո՛վ են ապաշխարում: Իսկ եթե Րաֆֆի Հովհաննիսյանը չգիտի կամ այդպես չի ընկալում աղոթքը, ներում եմ նրան, որովհետեւ ներումն էլ մեր Տիրոջ պատվիրանն է»:

Այսօր Aravot.am-ի հետ զրույցում Րաֆֆի Հովհաննիսյանը վստահեցրեց, որ քմծիծաղ եղել է. «Ասել եմ, որ ամիսներ անց ես վիդեոներ տեսել եմ, որտեղ քմծիծաղի նման մի բան եմ տեսել եւ դրանից հետո ես այլեւս ասելիք չունեմ: Դրան ի պատասխան՝ ոստիկանապետն իր գնահատականը տվեց: Դա իր իրավունքն է: Եթե աստվածավախ խոնարհումի իր անկեղծ արտահայտությունն է, դա, իհարկե, իր իրավունքն է: Ես պարզապես լռում եմ:

Դուք գիտեք, որ իմ ամբողջ քարոզարշավի ժամանակ աշխատեցի քաղաքացու եւ ոստիկանի համերաշխության ուղղությամբ: Նույն այդ օրը, երբ 18 տարեկան ոստիկաններ եւ բողոքավոր քաղաքացիներ դեմ դիմաց էին, ես որոշեցի եւ ճի՛շտ որոշեցի, որ ոչ մեկի արյունը չարժի թափել: Իսկ այն, որ Ծիծեռնակաբերդ մենք գնացինք, կարող է մարդիկ համաձայն լինեն կամ չլինեն, ես գնալու մասին հայտարարեցի հարթակից եւ ով միացավ այդ արշավին եւ մոմավառությանը՝ միացավ: Այդտեղ իմ կարծիքով ոչ անվանարկում կար, ոչ վիրավորանք: Եթե այդ հայտնի կադրի մեջ այլ բան է, քան քմծիծաղ, ուրեմն ես հերթական անգամ ներողություն կխնդրեմ»:

 

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (2)

Պատասխանել

  1. zaven says:

    Ախր զզուեցանք Ռաֆֆիէն ալ,ԲՀԿ-էն ալ,Մարզպետներէն ալ ,մնացեալ բոլոր դրածոյ արարածներէն ալ,
    մեզի խօսեցէք,անծանօթ նոր սերունդի անծանօթ հեռոսներու մասին։Քիչ մը մաքուր օդ շնչենք։

  2. Aram says:

    Վովա Գասպարյանը փարիսեցիության չեմպիոն ու անդերազանցելի ռեկորդակիր է աստվածաշնչյան ժամանակներից:
    Իսկ քմծիծաղը կար, դա տեսել և քննարկվել է, ողջ հասարակության տեսածը հերքելը հերթական ռեկորդ է

Պատասխանել

Օրացույց
Ապրիլ 2014
Երկ Երե Չոր Հնգ Ուրբ Շաբ Կիր
« Մար   Մայիս »
 123456
78910111213
14151617181920
21222324252627
282930