«Դեմ եմ» քաղաքացիական նախաձեռնության՝ այսօր Մատենադարանի մոտ աշխատավոր հասարակության մայիսի 1-ը շնորհավորելու եւ պարտադիր կուտակային համակարգի ապօրինության մասին իրազեկելու ակցիան քիչ մասնակիցներ էր հավաքել, ինչը շարժման ակտիվիստներից Սամվել Ղահրամանյանը Aravot.am-ին մեկնաբանեց այսպես. «Այսօրվա ակցիան կազմակերպելու գաղափարը քննարկվել է երեկ գիշեր եւ հասարակությանը տեղյակ պահվել միայն այսօր՝ 12 ժամ առաջ: Ով հասցրել է տեղեկանալ եւ ավելի սրտացավ է իր իրավունքների պաշտպանվածությանը, եկել է եւ իր մասնակցությամբ օգնում է շարժմանը: Մենք այսօր շնորհավորում ենք աշխատավոր մարդկանց տոնը եւ ցույց տալիս, որ, հակառակ վերջին շրջանում շրջանառվող կարծիքներին, թե «Դեմ եմ» նախաձեռնությունը մարում է, քաղաքացիական շարժումը, ընդհակառակը, չի մարում, այլ ավելի է միավորվում»:
Իսկ «Դեմ եմ» նախաձեռնող խմբի անդամ Մանուկ Զաքարյանը հավելեց. «Մենք այսօր քանակին առանձնապես կարեւորություն չենք տալիս, որովհետեւ այսօրվա խորհրդանշական օրը մենք ավելի շատ շնորհավորում ենք միմյանց: Կարեւորը որակն է: Ինչպես գիտեք, մենք մի ստրատեգիա ենք մշակել, որպեսզի «Դեմ եմ»-ը ունենա ցանցային պայքարի մեխանիզմ, ստեղծվեն «Դեմ եմ» փոքր համակարգեր՝ ամեն տեղ: Աշխատանքային կոլեկտիվներում ստեղծվեն խմբեր եւ այսուհետեւ նրանք լինեն նախաձեռնողներ: Այսօրվա ակցիան կազմակերպել է այդ համակարգի օղակներից մեկը: Առաջիկայում կլինի պարտադիր կուտակային համակարգի դեմ բողոքի ակցիա և հավատացած եղեք, որ նորից կտեսնեք բազմահազարանոց մասնակցություն»:
Աշոտ ՀԱԿՈԲՅԱՆ
