ՄԱԿ-ի անվտանգության խորհրդի նիստի ժամանակ Ռուսաստանն առաջարկել է Ուկրաինայում հակամարտությունը կարգավորելու մասին Ժնևի համաձայնագրին աջակցող հայտարարությամբ հանդես գալ, որով կպահանջվի անհապաղ դադարեցնել երկրում տեղի ունեցող բռնությունները: Փոխանցում է «ԻՏԱՌ-ՏԱՍՍ»-ը:
«Ինձ թվում է՝ լավ կլիներ, եթե մենք մեր նիստն ավարտեինք այդպիսի հայտարարությամբ», – ասել է ՄԱԿ-ի ԱԽ-ում ՌԴ ներկայացուցիչ Վիտալի Չուրկինը՝ ավելացնելով, որ փաստաթղթով պետք է կոչ անել «անհապաղ դադարեցնել ցանկացած տիպի բռնությունը, ներառյալ զինված ուժերի գործածումը Ուկրաինայի արևելքում և լրջորեն զբաղվել Ժնևի փաստաթղթի կետերի ամբողջական իրականացմամբ»:
«Եթե դուք պատրաստ եք հայտարարությանը ձեր աջակցությունը տալ, ապա մենք էլ պատրաստ կլինենք աջակցել», – նշել է նա:
Սրանից առաջ Չուրկինն ասել էր, որ Ուկրաինան վերացրել է Ժնևի համաձայնագրով հակամարտությունը կարգավորելու «վերջին հույսը»:
Կարդացեք նաև
Ռուսաստանն Ուկրաինայի արևելքում պատժիչ գործողությունների կապակցությամբ ՄԱԿ-ի անվտանգության խորհրդի արտահերթ նիստ է հրավիրել, որը սկսվել է Երևանի ժամանակով 20:00:
Կիևի իշխանությունները մայիսի 2-ի առավոտյան Սլավյանսկ քաղաքում հակաահաբեկչական գործողություններ են սկսել: Խփվել է երկու ուկրաինական ռազմական ուղղաթիռ: Կան զոհեր և վիրավորներ: Այս պահին հայտնի է երեք զոհերի մասին: Երկուսը՝ ուկրաինական կողմի զինվորականներ են, այդ թվում՝ ուղղաթիռներից մեկի օդաչուն, իսկ մեկը՝ անջատականների կողմից:
Պատրաստեց Հովհաննես ԻՇԽԱՆՅԱՆԸ
