Շիրակի մարզպետարանի տարածքային վարչության պաշտոնյաները, որոնք գրեթե ամենօրյա շփման մեջ են շիրակցի գյուղապետերի հետ, Ալվարի 53-ամյա գյուղապետ Արտավազդ Մկրտչյանին բնութագրեցին որպես կարգին «տղա» ու կարգին գյուղապետ:
Ռուբեն Հարությունյան
«Նա ամենամարդամոտն է Ամասիայի տարածաշրջանի գյուղապետերից: Այդ տարածքի բոլոր գյուղապետերի մեջ մեծ հեղինակություն է վայելում, երբեք խնդիրներ չի ունեցել բյուջեի կատարման, սեփական եկամուտների հավաքագրման հարցում: Մի անգամ 5-6 գյուղապետերով, նրա մեքենայով Ղարաբաղ ճանապարհորդեցինք, հաճույք ստացանք: Իրոք մեզ համար էլ զարմանալի է, թե ինչ է կատարվել նրա հետ: Բայց մենք ոչ մի տարօրինակ բան չենք նկատել նրա մոտ», – ասաց Շիրակի մարզպետարանի տարածքային վարչության տեղական ինքնակառավարման եւ համայնքային ծառայության հարցերի բաժնի պետ Ռուբեն Հարությունյանը:
Կարլեն Աբրահամյան
Տարածքային վարչության պետ Կարլեն Աբրահամյանն էլ, մեզանից լսելով Ալվարի գյուղապետի հետ կատարված դժբախտությունը, անչափ վատ զգաց: Նրա բնութագրմամբ, խոսքը հիանալի մարդու մասին է, որի հետ շփվելուց ու ճանապարհորդելուց միայն կարելի է հաճույք ստանալ: «Ես 2-3 ամիս է` Ամանորյա տոներից հետո չեմ տեսել Ռոին, մենք նրան այդպես ենք անվանում, մի անգամ զանգեցի, կանչեցի մարզպետարան, ասաց, որ զբաղված է, բայց խոստացավ անպայման գալ: Էս ինչքան վատ զգացի, փշաքաղվեցի, էս ի՞նչ ասիք»,- տխրեց տարածքային վարչության պետը:
Մարզի այլ պաշտոնյաներ էլ տեղեկացրեցին, որ նա 12 տարվա գյուղապետ է, ընտրված 3 անգամ, ՀՀԿ-ական է և նրա օրոք վերջ դրվեց գյուղում սամսարցիների և գանձեցիների միջև առկա կոնֆլիկտներին:
Կարդացեք նաև
Ավելի վաղ հայտնել էինք, որ Ալվար գյուղի 53-ամյա գյուղապետ Արտավազդ Մկրտչյանն այսօր առավոտյան դանակահարել էր կնոջն ու հարսին, այնուհետ իր «Ինֆինիտի» մակնիշի մեքենայով Ամասիա ուղևորվելու ճանապարհին ձորն էր գլորվել: Նրա մեքենան հրկիզվել էր, 97 տոկոսով այրվել է նաև գյուղապետի մարմինը: Նրա մոտ, ըստ ոստիկանության, 15 օր է` ինչ հոգեկան որոշակի խնդիրներ են նկատվել:
Հիվանդանոցից տեղեկացանք, որ գյուղապետի առողջական վիճակը գնալով վատանում է:
Նունե ԱՐԵՎՇԱՏՅԱՆ
