Մայիսի 18-ին նշվող թանգարանների միջազգային օրվան ընդառաջ` ինչպես հանրապետության տարբեր թանգարաններում, այնպես էլ Ավետիք Իսահակյանի տուն-թանգարանում, դեռեւս մայիսի 17-ից մեկնարկել է «Թանգարանների գիշեր» համաեվրոպական միջոցառումը: «Թանգարանները միավորում են մեզ» խորագիրը կրող ակցիայի շրջանակներում երեկվանից տարաբնույթ միջոցառումներ են կազմակերպվում տուն-թանգարանում:
Երեկ երեկոյան միջոցառումների շարքի մեկնարկը տվեցին Երևանի Վ. Բրյուսովիանվան պետական լեզվաբանական համալսարանի «Միջազգային լրագրություն» բաժնի ուսանողները` Ավետիք Իսահակյանի Աբու Լալա Մահարի քնարական պոեմը ներկայացնելով հայերեն, ռուսերեն, անգլերեն, արաբերեն լեզուներով:
«Պոեմն այնքան ասելիք, փիլիսոփայական խորք և զգացմունքի արտասովոր ուժ ունի, որ անվերջ կարելի է հիանալ, վերլուծել և յուրաքանչյուր անգամ նորովի բացահայտել։ Բնականաբար, հասկանալի է, որ ներկայացնել այդ ամենը՝ իր ողջ ընդգրկունությամբ, գրական այս փոքր երեկոյի շրջանակներում, հնարավոր չէ։ Սակայն փորձեցինք ուրվագծել պոեմի առանցքային գաղափարները, և վերջապես, բացահայտել, թե ով է եղել պոեմի քնարական հերոսի՝ Աբու Լալա Մահարու, իրական նախատիպի ով լինելը։ Արդյո՞ք նրա և Իսահակյանի մտածողության և ներաշխարհի միջև եղել է գաղափարական կապ և հոգեհարազատություն, թե Մեծ գրողը միայն անունն է վերցրել՝ Աբու Լալա Մահարի», -նշեց Վ. Բրյուսովի անվան պետական լեզվաբանական համալսարանի արաբերեն լեզվի դասախոս Արուսիկ Անդրեասյանը։ Նման միջոցառում կազմակերպելու գաղափարը «Վարդանանք» ռազմահայրենասիրական ակումբի տնօրեն Սաթենիկ Աբրահամյանին էր, իսկ ուսանողներն էլ առաջարկեցին մի փոքր ընդլայնել ծրագիրը եւ պոեմն ընթերցել նաեւ ռուսերեն, անգլերեն եւ արաբերեն տարբերակներով:
«Մենք նպատակ ունեինք մեր հանրությանը եւս մեկ անգամ հաղորդակից դարձնել Ավետիք Իսահակյանի ստեղծագործական ոգուն, ինչպես նաեւ լրացուցիչ տեղեկություններ տալ պոեմի օտարալեզու թարգմանությունների մասին, ուստի որոշեցինք միջոցառումը նման ձեւաչափով կազմակերպել: Մեզ հետ նաեւ ասմունքում էր թատերական ինստիտուտի երկրորդ կուրսի ուսանողներից մեկը: Կարծում ենք, ազգային արժեքները վերագնահատելու հիանալի առիթ էր մեզ ընձեռվել…», – հավելեցին «Միջազգային լրագրություն» բաժնի մագիստրատուրայի առաջին կուրսում սովորող ուսանողուհիները:
Իսահակյանի տուն-թանգարանում կազմակերպված միջոցառումները շարունակվեցին մինչեւ ուշ երեկո: Ավելի ուշ այցելուները հնարավորություն ունեցան հայկական ռոմանսի երեկոյի ընթացքում վայելելու իսահակյանական խոսքերով հնչող երգեր, մասնակցելու Իսահակյանի մասին պատմող վավերագրական ֆիլմերի ցուցադրությանը: Բացի այդ, այստեղ առաջին անգամ ցուցադրության էր ներկայացվել Ռուխկյանի, Սարյանի եւ այլ անվանի նկարիչների աշխատանքները:
Ավետիք Իսահակյանի տուն-թանգարանի տնօրեն Հասմիկ Մելքոնյանի խոսքով` «Թանգարանների գիշեր» համաեվրոպական միջոցառման նախաձեռնողներն ի սկզբանե նպատակ են ունեցել հանրությանը դեպի թանգարաններ բերել եւ հաղորդակից դարձնել մշակույթին ու մշակութային ժառանգությանը:
«Ուրախ եմ, որ «Թանգարանների գիշեր» ակցիան համախմբում, միավորում է մարդկանց այս շրջանակներում, ուրախ կլինեմ, որ այն ավելի մեծ ընդգրկում ստանա` մարդկանց համախբելով նաեւ խաղաղության, համամարդկային այլ արժեքների շուրջ …», – նշեց Հասմիկ Մելքոնյանը:
«Թանգարանները միավորում են մեզ» խորագիրը կրող ակցիայի շրջանակներում միջոցառումները կշարունակվեն նաեւ այսօր եւ մինչեւ կեսգիշեր թանգարանների դռները բաց կլինեն այցելուների համար:
Մերի ՍՈՂՈՄՈՅԱՆ
