«Այսօր՝ Եվրոպայի օրվա շրջանակներում շրջանառության մեջ է դրվում «Եվրոպա» խորագրի ներքո տպագրված ազգային երաժշտական նվագարաններ նամականիշերը»,- այսօր՝ մայիսի 24-ին, Եվրոպայի օրվան նվիրված տեղեկատվական ցուցահանդեսի ընթացքում հայտարարեց «Հայփոստ» ընկերության ներկայացուցիչ Աննա Ղուկասյանը:
Աննա Ղուկասյանը նշեց, որ «Պկու» նամականիշն ներկայացված է «Փոստ Եվրոպա» եվրոպական փոստային օպերատորների ասոցիացիայի կողմից հայտարարված մրցույթին: Նամականիշների մարման արարողությանը մասնակցեցին ՀՀ տրանսպորտի եւ կապի նախարարի տեղակալ Արթուր Առաքելյանը եւ Եվրամիության պատվիրակության ղեկավար Տրայան Հրիսթեան:
«Պկու» նամականիշի վրա պատկերված է պկու նվագարանը, իսկ խորապատկերին՝ հատված մանրանկարչությունից, որտեղ պատկերված է պկու նվագող երաժիշտը, իսկ «Զուռնա» նամականիշի վրա՝ խորապատկերին նույնպես հատված է մանրանկարչությունից, որի վրա պատկերված է զուռնա նվագող երաժիշտը:
Տեղեկատվական ցուցահանդեսի ընթացքում Ազատության հրապարակու տեղադրված տաղավարներում ցանկացողները կարող էին ծանոթանալ սահմաններ եւ միգրացիա, բիզնես եւ ներդրումներ, մշակույթ, բնապահպանություն, առողջապահություն աղքատության նվազեցում եւ այլ ոլորտներում Եվրամիության օժանդակությամբ իրականացվող ծրագրերի հետ:
Կարդացեք նաև
«Սյունիքի երիտասարդական կենտրոն» հասարակական կազմակերպության ներկայացուցիչ Աննա Օհանջանյանը Aravot.am-ի հետ զրույցում նշեց, որ Եվրամիության օգնությամբ իրականացնում են «Իմացի՛ր քո իրավունքները» ծրագիրը, որի նպատակն է աջակցել Հայաստանի, հատկապես՝ Սյունիքի մարզում քաղաքացիների սոցիալ-տնտեսական իրավունքների խթանմանն ու պաշտպանությանը.
«Ծրագրի արդյունքն այն է, որ Մեղրի քաղաքում բացվել է հանրային ընդունարան, որն արդեն մեկ տարի շարունակ պարբերաբար աջակցում է քաղաքացիներին, համայնքի բնակիչներին, օգնում է գիտելիք ձեռք բերել իրենց իրավունքների եւ պարտականությունների մասին, ինչպես նաեւ օգնում է որոշակիորեն պաշտպանել իրենց սոցիալ-տնտեսական իրավունքները: Կարծում եմ քաղաքացիական հասարակությանն աջակցող յուրաքանչյուր աջակցող կազմակերպություն ողջունելի են, որովհետեւ Հայաստանում թերի մակարդակում է քաղաքացիական հասարակության դերը»:
«Քաղաքացիական հասարակության ինստիտուտ»-ը ոչ միայն ներկայացնում էր իր ծրագրերը, այլ նաեւ թեստի միջոցով ստուգում էր ցանկացողների գիտելիքները ոստիկանության հետ շփվելիս իրենց իրավունքների մասին: Ինստիտուտի նախագահ Արման Դանիելյանը մեր հետ զրույցում նշեց, որ այդպիսով ցանկանում են մարդկանց իրազեկել, որպեսզի ավելի անվտանգ դառնա նրանց ոստիկանությունում գտնվելը: Անդրադառնալով Եվրոպայի օրվան պարոն Դանիելյանը նշեց՝ «Լավ տոն է, մեր արած գործունեությունն ենք կարողանում մեր մարդկանց ցույց տալ, որ հասկանան՝ կատարվող գործունեությունը, որ Եվրամիության օգնությամբ է Հայաստանում իրականացվում, իրապես մեր հասարակությանն անհրաժեշտ է»:
Ամի ՉԻՉԱԿՅԱՆ
