ՄԻՊ աշխատակազմի բռնությունների կանխարգելման վարչության պետ Երանուհի Թումանյանցի պատմելով, Մոսկվայում նախորդ տարի խոշոր ավտովթարի մեջ մեղադրվող Հրաչյա Հարությունյանի գործով դատաքննության ընթացքում շարունակվում են տուժածների հարցաքննությունները:
«Այն տուժածները, որոնք դեռ չեն կարող մասնակցել դատաքննությանը՝ քննվում են նրանց գրավոր ցուցմունքները, որոնք արվել են նախաքննության փուլում: Փաստաբանները դեմ չեն այդ ընթացակարգին, միայն երկու խնդիր են բարձրացնում, որ գրավոր ընթացակարգով չհարցաքննվեն ոստիկանները, որոնք ներգրավված են այն գործով, որով Հրաչյա Հարությունյանը մեղադրվում է կեղծ փաստաթուղթ ներկայացնելու մեջ եւ այն վարորդը, որը վարել է ավտոբուսի հետեւից գնացող մեքենան»,- այսօր «Անալիտիկ» ակումբում ասաց Երանուհի Թումանյանցը:
Նրա խոսքով, փաստաբանների կողմից Հրաչյա Հարությունյանի իրավունքների խախտում դեռ չի արձանագրվել. «Հրաչյա Հարությունյանը ընդունել է իր մեղքը ու պատրաստ է օգնել նախաքննական մարմնին ու դատարանին: Ամիսը մեկ անգամ բժշկական զննություն է կատարվում: Նրա առողջական վիճակը լավ է, դժգոհություններ չկան»:
Հրաչյա Հարությունյանի աղջիկն էլ` Լիլիթ Հարությունյանն ասաց՝ դեռ տեղյակ չէ, թե տուժածների հարազատները ինչ փոխհատուցում են պահանջում, նա նաեւ տեղեկություններ չունի՝ այդ ֆինանսական փոխհատուցումը իրեն ընտանի՞քը, թե՞ ինչ-որ այլ կազմակերպություններ կտրամադրեն:
Լիլիթ Հարությունյանը պատմեց, որ հոր հետ կապը միայն փաստաբանի միջոցով է, հեռախոսով խոսելու հնարավորություն չեն ունեցել, բայց փաստաբանը վստահեցնում է՝ հայրը խնդիրներ չունի:
Կարդացեք նաև
Հրաչյա Հարությունյանի՝ Հայաստան տեղափոխման խնդիրն էլ, ըստ Երանուհի Թումանյանցի, կարող է քննարկվել, երբ լինի օրինական ուժի մեջ մտած դատական ակտ:
Արփինե ՍԻՄՈՆՅԱՆ
