Ագրեսիվ հռետորաբանությունը վնասում է Ղարաբաղի հակամարտության խաղաղ կարգավորմանը, և կողմերը պետք է զերծ մնան գործողություններից, որոնք կարող են խափանել կարգավորման գործընթացը, հայտնել է ԱՄՆ պետդեպարտամենտի մամուլի խոսնակ Ջեյն Պսակին՝ խոսելով հայերի հասցեին հնչեցրած վերջին սպառնալիքների մասին: Փոխանցում է «Կոնտակտ»-ը:
Պետդեպում ճեպազրույցի ժամանակ Պսակիին հարց էր ուղղվել, թե ինչպես է նա գնահատում Ադրբեջանի նախագահ Իլհամ Ալիևի այն հայտարարությունը, որ Հայաստանին մութ ապագա է սպասվում, եթե զորքը դուրս չբերի Ղարաբաղից և եթե չձերբազատվի Հայաստանում գործող արյունարբու, կոռումպացված իշխանություններից:
Պսակին պատասխանել է, որ այդպիսի արտահայտությունները խաթարում են հակամարտությունը խաղաղ ճանապարհով կարգավորելու ջանքերը և հիշեցրել է, որ ԵԱՀԿ Մինսկի խմբի երկրները հորդորում են զերծ մնալ ուժի կիրառումից և ուժի կիրառման սպառնալիքներից և գործել համանախագահող երկրների ղեկավարների 2009-2013թթ. հայտարարություններին համաձայն:
Պատրաստեց Հովհաննես ԻՇԽԱՆՅԱՆԸ
