11-ամյա Կարոլինան եւ 13-ամյա Ռիտան, որոնք ճակատագրի բերումով մնացել են առանց ծնողների, ինը տարի է՝ ապրում են խնամատար ընտանիքում: Մարգարիտա Հարությունյանը նրանց խնամատար ծնողն է: Երեխաներն այս ընթացքում հասցրել են կապվել ու սիրել նոր մայրիկին:
Այսօր «Կոնգրես» հյուրանոցում, երեխաների միջազգային օրվա առիթով, աշխատանքի եւ սոցիալական հարցերի նախարարության եւ ՄԱԿ-ի մանկական հիմնադրամի նախաձեռնությամբ կազմակերպված միջոցառմանը ներկա էին մի քանի խնամատար ընտանիքներ՝ իրենց երեխաներով:
2005 թվականից մեր երկրում իրականացվում է մանկատների բեռնաթափման ծրագիր, որի նպատակն է առանց ծնողական խնամքի մնացած երեխաներին վերադարձնել կենսաբանական ընտանիք, սակայն, եթե հնարավոր չէ, ապա նրանց խնամքը հանձնել խնամատար ընտանիքին:
Կարդացեք նաև
Aravot.am-ի հետ զրույցում Մարգարիտա Հարությունյանն ասաց, որ պետության տված 135 հազար դրամ նպաստով, գնաճի այս պայմաններում, դժվար է երեխաների խնամքը լիարժեք ապահովել, սակայն ուրախ է, որ մայրիկ է դարձել:
Ներկայումս խնամատար ընտանիքներում խնամվում է 16 երեխա:
Նշենք, որ սոցիալական ոլորտի պատասխանատուներն արդեն քանի տարի է՝ սոցիալական փաթեթ են պատրաստում, որպեսզի ծնողը սոցիալական պատճառներով, երեխային չհանձնի մանկատուն:
Aravot.am-ի հարցին, թե մի կողմից մանկատները բեռնաթափում են, սակայն մյուս կողմից ընդունելություն են անում, ե՞րբ պետք է սոցիալական ծառայությունը մատուցվի կարիք ունեցող ընտանիքին, աշխատանքի եւ սոցիալական հարցերի նախարար Արտեմ Ասատրյանն ասաց, որ մեկ մանկատուն արդեն փակվել է, մյուսների բեռնաթափումն էլ աստիճանաբար տեղի կունենա:
Լուսինե ԲՈՒԴԱՂՅԱՆ
