Լրահոս
Օրվա լրահոսը

Ծննդկանի սկեսուրն էլ մարզի գլխավոր մանկաբարձ-գինեկոլոգին է սպառնացել կախաղան հանել

Հունիս 02,2014 22:34

Ինչպես տեղեկացրել ենք, 22-ամյա ծննդկան Նարինե Ղուկասյանի սկեսրայրը այսօր հայհոյանքներ է տեղացել Գյումրու ծննդատան բուժանձնակազմի հասցեին, հասել է ծննդատան տնօրեն Վարդան Սարգսյանի վրա` փորձելով ծեծել նրան: Իսկ պատճառը եղել է նրա թոռնիկի մահացած ծնվելը: Բանը հասել է նրան, որ թե սկեսրայրը և թե ծննդատան բուժանձնակազմը դիմել են ոստիկանություն, սկեսրայրը բողոքել է, որ իր թոռնիկը բժիշկների մեղքով է մահացել, իսկ ծննդատան անձնակազմը հայտարարություն է տվել վերջինիս խուլիգանական արարքի համար: Այժմ գործը գտնվում է Շիրակի մարզի դատախազ Րաֆֆի Ասլանյանի ուշադրության կենտրոնում:

Գյումրու ծննդատան տնօրեն Վարդան Սարգսյանի ասելով, Նարինեի մոտ եղել է ներարգանդային ինֆեկցիա: Aravot.am-ը այս թեմայի շուրջ պարզաբանումներ խնդրեց Շիրակի մարզի գլխավոր մանկաբարձ-գինեկոլոգ Ֆելիքս Գրիգորյանից, որը տեղեկացրեց, որ այդ նույն Նարինե Ղուկասյանը հղիության ժամանակ խնդիրներ է ունեցել և բուժվել է: Ըստ գինեկոլոգի, ինչից ասես կարող էր լինել ներարգանդային ինֆեկցիան, կինը բարձր ջերմաստիճանով է ծննդատուն տեղափոխվել, նրան հակաբորբոքային դեղեր են տվել: Բժշկական միջամտություն չեն արել, բաբախը վատացել է, դեղեր են սրսկել, այսինքն,  ըստ գինեկոլոգի, այդ դեղերը ուղղված են եղել բաբախը լավացնելուն: Գինեկոլոգի ասելով, այն, ինչ պիտի անեին բժիշկները, տեղը տեղին արել են: Ըստ նրա, երեխան կարող էր մահացած ծնվել նաև այն պատճառով, որ պորտալարը փաթաթված է եղել պարանոցին:

«Իմ մոտ եկավ ծննդկանի սկեսուրը ու հարցրեց` ինչո՞ւ կեսարյան հատում չեք արել, ես պատասխանեցի, տիկին, եթե անեինք ու երեխան դարձյալ մահացած ծնվեր, ո՞րն էր դրա իմաստը, էդ դեպքում ի՞նչ կանեիք: Տիկինը ոչ ավել, ոչ պակաս պատասխանեց` ձեզ կախաղան կհանեի, մտածեցի լավ ենք պրծել, եկաք հայհոյեցիք, գնացիք, բա որ իրոք գործը անցներ կախաղանի: Չգիտեմ ինչ է կատարվում, երևի օգտվելով լրատվամիջոցների առատությունից` մարդիկ սկսել են շոուներ սարքել, տեսնում են մյուսները շոուների մեջ են, մտածում են` մենք ինչո՞ւ չսարքենք»,- ասաց Ֆելիքս Գրիգորյանը:

 

Նունե ԱՐԵՎՇԱՏՅԱՆ 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունիս 2014
Երկ Երե Չոր Հնգ Ուրբ Շաբ Կիր
« Մայիս   Հուլ »
 1
2345678
9101112131415
16171819202122
23242526272829
30