Էստոնացի պատգամավոր, ԵԽԽՎ-ում «Եվրախորհրդի անդամ երկրներում իրավապաշտպանների դերն ու ապահովությունն ամրապնդելու» հարցով զեկուցող Մայլի Ռեփսը դատապարտել է Ռուսաստանում հ/կ-ների դեմ գործող «արտասահմանյան գործակալների» մասին օրենքը՝ նշելով, որ Ռուսաստանում տեղի ունեցող վերջին դեպքերը ապացուցում են, որ պետությունը շարունակում է իրավապաշտպանների դեմ արշավը՝ քաղաքացիական հասարակությանը լռեցնելու նպատակով:
«Ես հատկապես անհանգստացած եմ անվանի հ/կ-ի՝ «Մեմորիալ» մարդու իրավունքների կենտրոնը «արտասահմանյան գործակալ» գրանցելու դեպքով, ինչպես նաև «Արտասահմանյան լրտեսների» մասին օրենքում կատարված վերջին փոփոխությունով, որը նման գործընթացներ իրականացնելու համար ավելի լայն հնարավորություն է ստեղծել գործադիր մարմնին», – ասել է Ռեփսը՝ ավելացնելով, որ Ռուսաստանի իշխանությունները վեհաժողովին խոստացել էին, որ նշված օրենքը կվերանայվի Դումայում, որպեսզի չխախտի մարդու իրավունքների նկատմամբ միջազգայնորեն ստանձնած իր պարտականությունները, – «Այս գործողություններն ամենևին չեն համապատասխանում տրված խոստումին»:
Այսպես կոչված «Արտասահմանյան գործակալների օրենք»-ը ընդունվել է 2012թ. նոյեմբերին, ըստ որի, բոլոր հ/կ-ները, որոնք դրսից են ֆինանսավորվում և «քաղաքականությամբ են զբաղվում» պետք է գրանցել որպես «արտասահմանյան գործակալ»: 2014թ. մայիսի 23-ին Դուման օրենքի մեջ փոփոխություն է կատարել, որը թույլ է տալիս արդարադատության նախարարին հ/կ-ն գրանցել որպես «արտասահմանյան լրտես» առանց դատարանի որոշման:
Պատրաստեց Հովհաննես ԻՇԽԱՆՅԱՆԸ
